سه‌ره‌تا‌|ئێمه‌|پۆکسوید‌|که‌رته‌کان|هه‌واڵ‌|چالاکی|په‌یوه‌ندی
avataravataravatar
avatar
22 Mar 2011
جەلال مەلا مستەفا
ئەو ساتانەی مێژوو شایەتێکی بە ویژدانە بۆ سلێمانی زۆر گیان و ڕۆحی دەرچوو نەمر ئەبن.....
avatar
6 Mar 2011
وه‌ستا سه‌لام
به‌ بۆنه‌ی یاده‌وه‌ری ساڵ رۆژی ڕاپه‌رینی شاری هه‌ولێر
avatar
22 Feb 2011
فه‌رید ئه‌سه‌سه‌رد
خۆپیشاندان و دایه‌لۆگ و چاکسازیی
avatar
19 Feb 2011
هێمن حـەسـمەن/ ســوید
ئۆپۆزسیۆنی بێ سەرکردە!
avatar
19 Feb 2011
بورهان ئه‌مین
ڕێگرتن له ‌قه‌یران
avatar
19 Feb 2011
شادمان مه‌لا حه‌سه‌ن
ئارامی بۆ كۆمه‌لگاكه‌مان پێویسته‌
avatar
11 Feb 2011
به‌کرحه‌بیب
چۆن یه‌کێتی نیشتیمانی کوردستان بگەیەنینەوە لوتکە؟
avatar
24 Jan 2011
هێمن حـه‌سـه‌ن/ سوید
ئۆپۆزیسۆن و دەسەڵات لەناو کایە سیاسیەکاندا!
 
avatar

مه‌لا به‌ختیار: مه‌كته‌بی سیاسی هه‌ڵه‌یه‌کی قورسی كرد

19 Apr 2010

سازدانی: چاودێر
دوای نزیكه‌ی شه‌ش ساڵ له‌ده‌رچونی، "چاودێر" بۆ یه‌كه‌مینجار دیدارێكی تایبه‌ت‌و كراوه‌ له‌گه‌ڵ مه‌لا به‌ختیار، كارگێڕ‌و وته‌بێژی مه‌كته‌بی سیاسیی یه‌كێتی‌و خاوه‌ن ئیمتیاز‌و سه‌رنوسه‌ری "چاودێر" سازده‌كات. هه‌ڵبه‌ته‌ له‌م دیداره‌دا، مه‌لا به‌ختیار زیاتر وه‌ك پۆسته‌ سیاسییه‌كه‌ی، نه‌ك رۆژنامه‌نوسییه‌كه‌ی دوێنراوه‌، له‌كاتێكدا له‌ماوه‌ی 270 ژماره‌ی رابردوی "چاودێر"دا، له‌ناو "چاودێر"دا چه‌ندین وتاری ره‌خنه‌یی له‌سه‌ر بڵاوكراوه‌ته‌وه‌، به‌پێچه‌وانه‌یشه‌وه‌، هیچ وتار‌و بابه‌تێكی ستایشئامێز له‌سه‌ر ناوبراو بڵاونه‌كراوه‌ته‌وه‌.
مه‌لا به‌ختیار، له‌م دیداره‌دا، راشكاوانه‌ قسه‌ له‌سه‌ر بارودۆخی ناوخۆی یه‌كێتی، پرس‌و پێشهاته‌ سیاسییه‌كان، له‌پێش هه‌مویانه‌وه‌ كۆنگره‌ی چاوه‌ڕوانكراوی یه‌كێتی ده‌كات.


ئه‌و كارگێڕه‌ی مه‌كته‌بی سیاسیی یه‌كێتی، كه‌میی كورسیی به‌ده‌ستهاتوی یه‌كێتیش بۆ ئه‌نجومه‌نی نوێنه‌رانی عیراق به‌"هه‌ڵه‌یه‌كی قورس" وه‌سفده‌كات‌و، ئۆباڵه‌كه‌یش ده‌خاته‌ ئه‌ستۆی مه‌كته‌بی سیاسی، "مه‌كته‌بی سیاسی زیاتر له‌كۆمیته‌ی سه‌ركردایه‌تی، ته‌حه‌ممولی مه‌سئولیه‌تی ئه‌و هه‌ڵه‌ ته‌كنیكییه‌ ده‌كات".

چاودێر: چۆن ده‌ڕوانیته‌ ئه‌نجامی هه‌ڵبژاردنه‌كانی 7/3، چ به‌نسبه‌ت كورد به‌گشتی، چ به‌نسبه‌ت لیستی هاوپه‌یمانییه‌وه‌، هه‌روا به‌نسیبه‌ت یه‌كێتیش به‌تایبه‌تی؟
مه‌لا به‌ختیار
: هه‌ڵبژاردنه‌كه‌ ئاڵۆزو چاره‌نوسساز بو، به‌پێی‌ یاسایه‌كی‌ دژوار به‌ڕێوه‌چوو. سه‌ره‌ڕای‌ ئه‌مه‌ش، من سێگۆشه‌یه‌ك له‌م هه‌ڵبژاردنه‌دا ده‌بینم، گۆشه‌ی یه‌كه‌می: هاوپه‌یمانی له‌سه‌ر ئاستی‌ عیراق سه‌ركه‌وتو بو، به‌ته‌نیا سێ به‌رامبه‌ری هه‌ر سێ لایه‌نه‌كه‌ی ده‌ره‌وه‌ی هاوپه‌یمانی هێناوه‌؛ وه‌كو یه‌كێتیش، كۆی ده‌نگه‌كانی، له‌سه‌ر ئاستی هه‌ڵبژاردنی عیراقدا باشه‌، ئه‌مه‌ دووه‌م؛ سێهه‌میش: وه‌كو ژماره‌ی‌ كورسی‌ به‌نسبه‌ت یه‌كێتییه‌وه‌، هه‌ڵه‌ی ته‌كنیكی خراپمان كردوه‌، ژماره‌ی كاندیده‌كانمان زۆر بون، له‌به‌رئه‌وه‌ باجه‌كه‌یماندا، جگه‌ له‌پارێزگای دیاله‌، له‌هه‌مو پارێزگاكانی تر ده‌نگی كاندیده‌كانی یه‌كێتی خراونه‌ته‌ سه‌ر ده‌نگی كاندیده‌كانی پارتی، به‌مه‌ش هه‌شت هه‌تا نۆ كورسیمان له‌ده‌ست چووه‌.

چاودێر: باست له‌وه‌كرد "یه‌كێتی ده‌نگی زۆرو كورسیی كه‌می هێنا"، هه‌ندێ له‌كادرانی خواره‌وه‌ی یه‌كێتی، هه‌تا ده‌زگای هه‌ڵبژاردنی یه‌كێتیش باس له‌وه‌ده‌كه‌ن، ئه‌مه‌ هه‌ڵه‌ی سه‌ركردایه‌تی‌و مه‌كته‌بی سیاسی بو، وه‌ڵامی ئێوه‌ بۆ ئه‌مه‌ چییه‌؟
مه‌لا به‌ختیار:
ئۆباڵ به‌گه‌ردنم ئه‌م قسه‌یه‌ راسته‌، مه‌كته‌بی سیاسی زیاتریش له‌كۆمیته‌ی سه‌ركردایه‌تی ته‌حه‌مولی مه‌سئولیه‌تی ئه‌و هه‌ڵه‌ ته‌كنیكییه‌ ده‌كات، كه‌ هه‌ڵه‌یه‌كی قورس بو، هه‌ڵبه‌ته‌ هه‌مو مه‌كته‌بی سیاسی به‌رپرسیاری‌ ئه‌م هه‌ڵه‌یه‌ نین، چونكه‌ تا دوایین كۆبونه‌وه‌ی پێش هه‌ڵبژاردنیش، هه‌ندێكمان رامان وا بوو كاندیده‌كانمان كه‌مبكه‌ینه‌وه‌. مه‌خابن نه‌مانتوانی‌ بیروڕاكانمان بچه‌سپێنین.

چاودێر: هه‌ر له‌سه‌ر گله‌یی قاعیده‌ی یه‌كێتی له‌سه‌ركردایه‌تی، باس له‌وه‌ده‌كرێت په‌یمانی ئاكار جێبه‌جێنه‌كرا، یان هۆكاری ده‌سته‌گه‌ری هێشتا
ئاسه‌واری به‌سه‌ر یه‌كێتییه‌وه‌ هه‌یه‌، بۆیه‌ رێژه‌ی كورسییه‌كان به‌وشێوه‌یه‌ بو؟

مه‌لا به‌ختیار:
من ناتوانم بڵێم په‌یمانی ئاكار هه‌موی جێبه‌جێكراوه‌، ناشتوانم بڵێم هه‌موی جێبه‌جێنه‌كراوه‌، هیچ نه‌بێت په‌یمانی ئاكار له‌نێوان پلینۆم تاكو ئێستا، وایكرد كه‌ به‌زه‌قی و به‌ڕه‌قی، وه‌كو پێش پلینیۆم ته‌كه‌تول له‌ناو یه‌كێتیدا نه‌كرێ. به‌ڵێ‌ پاشماوه‌ی‌ ده‌سته‌گه‌ری‌ له‌ناوماندا هه‌ر ماوه‌ و له‌هه‌ڵبژاردنیشدا زیانی‌ پێگه‌یاندین.

چاودێر: بۆچونی جیاواز له‌سه‌ر میكانیزمی هه‌ڵبژاردنه‌كه‌ هه‌بو له‌ناو مه‌كته‌بی سیاسیدا، یان رێكنه‌كه‌وتوبن له‌سه‌ر شێوازێك؟
مه‌لا به‌ختیار:
به‌ڵێ بۆچونی جیاواز له‌مه‌كته‌بی سیاسی هه‌بو، له‌سه‌ر كه‌مكردنه‌وه‌ی كاندیده‌كان و ئالیه‌تی كاركردنمان، گه‌رچی‌ مه‌كته‌بی‌ هه‌ڵبژاردن زانیاریی‌ باشیشی‌ پێشكه‌شی‌ مه‌كته‌بی‌ سیاسی‌ كرد. به‌ڵام وه‌كو پێویست كارمان پێ نه‌كرد.

چاودێر: ده‌وترێت ده‌رنه‌چونی یه‌كێك له‌كاندیده‌كانی یه‌كێتی، یان به‌ده‌ستنه‌هێنانی ده‌نگی پێویست بۆ خاتو "ئه‌مه‌ل جه‌لال"، كه‌ ئه‌ندامی مه‌كته‌به‌، ده‌خه‌نه‌ ئه‌ستۆی مه‌كته‌بی رێكخراوه‌ دیموكراتییه‌كان؟

مه‌لا به‌ختیار:
من ده‌ڵێم ئه‌مه‌ خوێندنه‌وه‌یه‌كی قوڵ نییه‌، واته‌ حكومدان له‌سه‌ر ده‌وری مه‌كته‌بێك وه‌كو مه‌كته‌بی رێكخراوه‌ دیموكراتییه‌كان، پێویستی به‌ئاماره‌، پێویستی‌ به‌راپرسی‌ وردی‌ هه‌مه‌لایه‌نه‌ی‌ چین‌و توێژه‌كانی‌ كۆمه‌ڵ‌‌و حیزب‌و ئۆرگانه‌ مه‌ده‌نیه‌كانه‌. له‌هه‌مو مه‌ڵبه‌نده‌كان، له‌هه‌مو كۆمیته‌كان، له‌هه‌مو رێكخراوه‌كان، ئێمه‌ ئێستا لیژنه‌یه‌كی لێكۆڵینه‌وه‌مان داناوه‌، بۆ ئه‌م لیژنه‌یه‌ داوای ئه‌ندامی مه‌كته‌بی رێكخستن، نوێنه‌ری مه‌ڵبه‌ندی هه‌ولێر، كه‌ركوك، گه‌رمیان، راپه‌ڕین، سلێمانی‌و مه‌ڵبه‌ندی دهۆكمان كردوه‌، دوا ئه‌نجامی هه‌ڵسه‌نگاندنی ئه‌م لیژنه‌یه‌ به‌هه‌ند وه‌رده‌گرین‌و ده‌یكه‌ینه‌ بنه‌ما بۆ سزادانی‌ كادرو رێكخراوی‌ هه‌ڵنه‌سوڕاو، هه‌روا پاداشتكردنی‌ چالاكه‌كانیان به‌ئه‌ندامانی‌ مه‌كته‌ب‌و ئه‌نجومه‌ن‌و ناوه‌نده‌كانیشه‌وه‌. له‌لایه‌كی تره‌وه‌ من ده‌پرسم: چ ژنێك له‌سه‌رئاستی عیراق به‌قاسمی ئینتیخابی ده‌رچوه‌، یان چ ژنێك له‌ناو یه‌كێتی‌، له‌سه‌رانسه‌ری كوردستاندا به‌قاسمی ئینتیخابی ده‌رچو، ته‌نانه‌ت هی هاوپه‌یمانیی كوردستانیش، یه‌كێتیی نیشتمانیی كوردستان 648 هه‌زار ده‌نگی هێناوه‌؛ له‌ناو پارێزگای سلێمانیدا كه‌ ملیۆنێك زیاتر ده‌نگده‌ری تێدایه‌، ته‌نها هه‌ڤاڵێكی‌ پیاومان به‌قاسمی ئینتیخابی ده‌رچوه‌، ئه‌مه‌ راچڵه‌كینێكه‌ بۆ هه‌مو تاكێكی كورده‌واری‌، واته‌ ئێمه‌ تاچه‌ند توانیومانه‌ له‌15-16 ساڵی رابردودا روبه‌ری پێشكه‌وتنخوازی‌و تێگه‌یشتن له‌مافه‌ دیموكراتییه‌كانی ژنان باش له‌ناو كۆمه‌ڵدا ببه‌ینه‌ پێشه‌وه‌، چۆن توانیومان ئه‌قڵی خورافیات، سه‌له‌فی، مه‌زهه‌بی، دواكه‌وتن، ئه‌قڵی‌ خێڵگه‌ری‌ له‌مێشكی پیاو و ژندا بسڕینه‌وه‌، بۆئه‌وه‌ی له‌ یه‌كسانی‌ سیاسی ژن‌و پیاو تێ بگه‌ن، تا له‌هه‌ڵبژاردنێكی ئاوادا ژنێكی به‌قابیلیه‌ت‌و پیاوێكی به‌قابیله‌یه‌ت ده‌بینن هیچ جیاوازی نه‌كه‌ن له‌ده‌نگدان به‌ژنه‌ به‌قابیلیه‌ته‌كه‌ش. جگه‌له‌وه‌یش هه‌ڤاڵ‌ ئه‌مه‌ل كه‌ كاندیدی پارێزگای سلێمانی بوه‌، ئێمه‌ وه‌كو مه‌كته‌ب، به‌هیچ شێوه‌یه‌ك له‌ده‌وروبه‌ری‌ پارێزگای سلێمانی كه‌ ناوه‌ندی رێكخراوه‌كانی شاره‌زوور ، گه‌رمیان، بتوێن‌و راپه‌رین، ناوه‌ندی رێكخراوه‌كانی چه‌مچه‌ماڵمان هه‌یه‌، له‌گه‌ڵ ناوه‌ندی هه‌مو قه‌زاو ناحیه‌و دێهاته‌كان، نه‌ به‌نوسراوی ره‌سمی، ئیلزاممان نه‌كردون كه‌ ده‌نگ ته‌نها به‌ئه‌مه‌ل بده‌ن، به‌پێچه‌وانه‌وه‌ پێمانوتون ده‌نگ به‌كاندیدی ناوچه‌كانی خۆتان بده‌ن، به‌شبه‌حاڵی خۆم له‌گه‌ڵ هه‌ر ناوچه‌یه‌ك‌و هه‌ر ناوه‌ندێكدا قسه‌م كردبێت، له‌گه‌ڵ هه‌ر مه‌ڵبه‌ندێك قسه‌م كردبێت، چه‌ندین به‌رپرسی مه‌ڵبه‌ند شاهیدن، وتومه‌ كاندیدی ناوچه‌كه‌ی خۆتان به‌دڵ بێت، یان به‌دڵ نه‌بێت، ده‌نگی بده‌نێ، هه‌ر ئه‌وه‌یشمان به‌ناوه‌ندی رێكخراوه‌كانیشمان وتوه‌، له‌لایه‌كی تره‌وه‌، به‌هۆی سه‌رقاڵیم به‌ناوچه‌كانی دیاله‌و خانه‌قین، جه‌نابی مام جه‌لال سه‌رپه‌رشتی رێكخراوه‌ دیموكراتییه‌كانی كردوه‌، قابیله‌ جه‌نابی ته‌وجیهی كردوه‌ كه‌ ده‌نگ به‌ئه‌مه‌ل بده‌ن؟ له‌به‌رئه‌وه‌ی ئه‌گه‌ر به‌چه‌ند رێكخراوێكمان وتوبێت ده‌نگ به‌هه‌ڤاڵ‌ ئه‌مه‌ل بده‌ن، خۆ مه‌كته‌بی رێكخراوه‌كان دو رێكخراو و سێ رێكخراوی‌ نیه‌. باقیه‌كه‌ی سه‌رپشك بوه‌ له‌بڕیاردان، له‌گه‌ڵ ئه‌وه‌شدا، با لێكۆڵینه‌وه‌كه‌ ده‌ربكه‌وێت هه‌تا بزانن رێكخراوه‌ دیموكراتییه‌كان ده‌وریان كه‌متربوه‌ له‌مه‌كته‌به‌كانی‌ تر.

چاودێر: مه‌كته‌بی رێكخراوه‌ دیموكراتییه‌كان به‌شێوه‌یه‌كی ره‌سمی له‌لایه‌ن مه‌كته‌بی سیاسییه‌وه‌ هیچ نوسراوێكی بۆ هاتوه‌ بۆ ئه‌وه‌ی كاندیدێك، یان چه‌ند كاندیدێك بۆ پارله‌مانی عیراق ده‌ستنیشانبكات، واته‌ ئه‌و كاندیده‌ی كه‌ به‌ناوی كاندیدی مه‌كته‌بی رێكخراوه‌كانه‌وه‌ بڵاوبۆوه‌، كه‌ ئه‌مه‌ل خان بو له‌لایه‌ن مه‌ڵبه‌نده‌وه‌ ده‌ستنیشانكرا یان لایه‌نی تره‌وه‌؟

مه‌لا به‌ختیار:
له‌لایه‌ن مه‌ڵبه‌ندی سلێمانییه‌وه‌ ده‌ستنیشانكرا، به‌دو فلته‌ری هه‌ڵبژاردن و راپرسی مه‌ڵبه‌ندو رێكخراوێكی (NGO) ده‌رچو، ئینجا بوو به‌كاندید، ئێمه‌ داوامان نه‌كردوه‌ خۆی هه‌ڵبژێرێت بۆ په‌رله‌مان، هه‌ڤاڵ‌ ئه‌مه‌ل كاتێك كاندیدكرا هات پرسی به‌من كردو وتی: ته‌كلیفم لێكراوه‌ ببمه‌ كاندید، بیكه‌م یان نه‌یكه‌م؟ وتم بیكه‌و سه‌ركه‌وتوبیت.

چاودێر: كه‌واته‌ له‌حاڵه‌تی ده‌رنه‌چونیشدا ناكرێ مه‌كته‌بی رێكخراوه‌كان تۆمه‌تباربكرێت؟
مه‌لا به‌ختیار:
تۆمه‌تم قبوڵ نییه‌، به‌ڵام ئه‌گه‌ر هه‌ڵه‌ كرابێت، یان وه‌ك پێویست كارنه‌كرابێت بۆ ئه‌وه‌ی ئه‌مه‌ل ده‌رچێت، به‌قه‌د ئه‌وه‌ی هه‌ڵه‌كراوه‌، ته‌حه‌مولی مه‌سئولیه‌ته‌كه‌ ده‌كه‌ین، به‌ڵام ئه‌گه‌ر قسه‌ له‌سه‌ر ئه‌وه‌یه‌ مه‌كته‌بی رێكخراوه‌كان بخرێته‌ قه‌فه‌س بۆ تۆمه‌تباركردنی‌ له‌سه‌ر یه‌ك كاندید، له‌حاڵه‌تی‌ وادا با هه‌مومان كارته‌كانمان بخه‌ینه‌ سه‌ر مێز. با وردتر لێكی‌ بده‌ینه‌وه‌ كه‌ بۆچی‌ نه‌ك ژنه‌ كاندیدێكی‌ یه‌كێتیی‌، به‌ڵكو بۆچی‌ دوو ئه‌ندامی‌ مه‌كته‌بی‌ سیاسیش ده‌رنه‌چوون؟ ئینجا بزانین كاریگه‌ریی‌ هه‌موو مه‌كته‌به‌كان به‌و ئیمكانیه‌ته‌ی‌ له‌به‌رده‌ستیان بووه‌، چه‌ند بووه‌ له‌سه‌ر رای‌ گشتی‌‌و بۆ بره‌وپێدانی‌ فكرو فه‌لسه‌فه‌ی‌ یه‌كێتیی‌.

چاودێر: هه‌ستده‌كرێ جۆرێ له‌ناتێگه‌یشتن له‌ناو سه‌ركردایه‌تی‌و به‌شێك له‌مه‌كته‌بی سیاسی یه‌كێتی، ده‌رباره‌ی چه‌مكی ئه‌ندامێتی له‌ناو رێكخراوه‌ پیشه‌ییه‌كان‌و حزبه‌كان هه‌یه‌، هیچ جیاوازییه‌ك له‌نێوان ئه‌ندامێكی رێكخستن‌و ئه‌ندامێكی رێكخراوه‌كان ناكه‌ن، پێیانوایه‌ ئه‌وه‌ی رێكخراوه‌كان‌و ئه‌وانه‌ی رێكخستن به‌هه‌مان ده‌نگ‌و ره‌نگ ئه‌ندامی حزبین؟
مه‌لا به‌ختیار:
ئه‌و جیاوازییه‌، مململانێیه‌كه‌ ره‌نگدانه‌وه‌ی‌ جیاوازیی بیركردنه‌وه‌یه‌ له‌ناو پرۆسه‌ی دیموكراسی، هه‌رده‌م پرۆسه‌ی دیموكراسییه‌ تازه‌ سه‌رهه‌ڵداوه‌كان، هه‌میشه‌ ئه‌م تێگه‌یشتنه‌ جیاوازه‌ بۆ دیموكراسی له‌ناو كۆمه‌ڵه‌ تازه‌ پێشكه‌وتوه‌كاندا زۆره‌، واته‌: ئه‌گه‌ر بچینه‌وه‌ بۆ رابردوی دیموكراسی، له‌سه‌ر ئه‌م مافه‌ دیموكراسییانه‌ وه‌كو مافی سیاسی و مه‌ده‌نی وه‌رمانگرتوه‌، له‌سه‌ده‌ی حه‌ڤده‌هه‌م و هه‌ژده‌هه‌م سه‌دان هه‌زار كه‌س له‌سه‌ر مافه‌ مه‌ده‌نیه‌كان چه‌وساوه‌ته‌وه‌، ته‌نانه‌ت بونه‌ته‌ قوربانیش، تا ئه‌م مافانه‌یان به‌دیهێناوه‌، له‌كوێش چه‌وساونه‌ته‌وه‌؟ له‌ناو خودی سیستمه‌ دیموكراتییه‌كاندا چه‌وساونه‌ته‌وه‌، له‌یه‌كی ئایاردا كه‌ كرێكاران ده‌كوژرێن، خۆ له‌سایه‌ی سیستمێكی دیموكراسیدا كوژراون، بزوتنه‌وه‌ی شارتییه‌ كه‌ گه‌وره‌ترین‌و درێژترین بزوتنه‌وه‌ی كرێكارانی جیهان بوه‌، دوساڵی خایاند، له‌به‌رامبه‌ر سیسته‌می‌ دیموكراسی به‌ریتانیا ئه‌مه‌ كراوه‌، كۆمه‌نه‌ی پاریس كه‌ قه‌تڵوعامی تیاده‌كرێت، له‌سایه‌ی سیستمی دیموكراسی كراوه‌، بزوتنه‌وه‌ی كرێكاران، بزوتنه‌وه‌ی جوتیاران، فیمینیسته‌كانی جیهان، هی لاوان، هی خوێندكاران، هه‌مویان له‌سایه‌ی‌ سیسته‌مه‌ دیموكراتیه‌كاندا خه‌باتی‌ سه‌ختیان كردووه‌. ته‌نانه‌ت له‌ناو حزبه‌دیموكراتییه‌كانیشدا به‌ململانێیه‌كی سه‌خت و دژوار توانیویانه‌ مافه‌ مه‌ده‌نی‌و دیموكراسی‌‌و ئازادییه‌كانیان بچه‌سپێنن، ئه‌مه‌ شتێك نییه‌ ته‌نها بۆ كورد وابێت، یان بۆ سه‌ركردایه‌تی یه‌كێتی وابێت. به‌ڵێ جیاوازی ئاستی هۆشیاری‌و دیموكراسی هه‌یه‌، له‌مه‌شه‌وه‌ جیاوازی‌ تێگه‌یشتن سه‌ریهه‌ڵداوه‌و ئه‌مه‌ش له‌ناو حیزب‌و رێكخراوه‌كاندا ره‌نگی‌ داوه‌ته‌وه‌. من ده‌توانم بڵێم ئێستا له‌كوردستاندا، له‌ناو هه‌مو حزبه‌كاندا، به‌ده‌یان مه‌سئولت بۆ ده‌هێنم ناتوانێت موحازه‌ره‌یه‌ك له‌سه‌ر دیموكراسی بڵێت، مه‌سئولی گه‌وره‌ گه‌وره‌، ته‌نانه‌ت سكرتێری‌ حیزبیش، ناتوانێت نیو سه‌عات له‌سه‌ر عه‌لمانیه‌ت، له‌سه‌ر مه‌ده‌نیه‌ت قسه‌ بكات، باشه‌ مه‌سئولی گه‌وره‌ نه‌توانێت نیو سه‌عات له‌سه‌ر دیموكراسی قسه‌ بكات، چۆن ده‌توانێت تێبگات خه‌باتی‌ مه‌ده‌نی‌‌و رێكخراوه‌كان له‌سایه‌ی دیموكراسیدا چه‌ند گرنگه‌ بۆ سیسته‌م‌و كۆمه‌ڵی‌ دیموكراسی؟!

چاودێر: ئێوه‌ وه‌كو كه‌سێكی داكۆكیكار له‌سیستمی عه‌لمانیه‌ت، له‌و دو هه‌ڵبژاردنه‌ی پێشودا ئه‌نجامی حزبه‌ ئیسلامییه‌كان چۆن هه‌ڵده‌سه‌نگێنی؟

مه‌لا به‌ختیار:
به‌شبه‌حاڵی خۆم پێموایه‌ حزبه‌ئیسلامگه‌راكان تائێستاش له‌بازنه‌یه‌كی داخراودا سیاسه‌ت ده‌كه‌ن، كه‌مێك پێشكه‌وتن، یان تۆزێك ده‌ستكه‌وتی زیاتر به‌دیهێنانیان، له‌سه‌ر هه‌ڵه‌ی‌ ده‌سه‌ڵات‌و خۆپارێزی‌ حیزبه‌ دیموكرات‌و چه‌په‌كانه‌، نه‌ك له‌سه‌ر ستراتیژێكی ئه‌قڵانی‌و په‌یامێكی مێژویی، یان به‌هۆی‌ بزوتنه‌وه‌یه‌كی مێژویی ئایینی و مه‌زهه‌بی كه‌ سه‌ره‌نجامی‌ چه‌وساندنه‌وه‌یان له‌وڵاتی‌ ئێمه‌دا سه‌ریان هه‌ڵدابێ‌، شتێك نییه‌ له‌كوردستاندا به‌ناوی بزوتنه‌وه‌یه‌كی ئایینی مه‌زهه‌بی كۆمه‌ڵایه‌تی، چونكه‌ نه‌ دین نه‌ مه‌زهه‌ب له‌وڵاتی ئێمه‌دا چه‌وساندنه‌وه‌یان له‌سه‌ر نییه‌، له‌شوێنێكدا چه‌وساندنه‌وه‌ نه‌بێت له‌به‌رامبه‌ریدا بزوتنه‌وه‌ی كۆمه‌ڵایه‌تی سیاسیش نییه‌؛ ئه‌ڵته‌رناتیڤی سیاسیش نییه‌؛ له‌به‌رئه‌وه‌ ئه‌و چوارچێوه‌یه‌ی كه‌ هه‌یانه‌، له‌هه‌ڵبژاردنی 1992ه‌وه‌ تائێستا گۆڕانكاریی زۆر گه‌وره‌یان تیا به‌دینه‌هێناوه‌، هه‌ر هێنده‌یه‌ ئه‌وانیش چه‌ندین دووبه‌ره‌كیان كه‌وتۆته‌ ناو، هی‌ تریشیان به‌ڕێوه‌یه‌! واته‌ پێموایه‌ زۆربه‌ی هه‌ره‌ زۆری هێزه‌ ئیسلامگه‌راكان شه‌ڕ له‌سه‌رئه‌وه‌ ده‌كه‌ن، كاریگه‌رییه‌ سیاسییه‌ كۆمه‌ڵایه‌تییه‌كانیان بپارێزن، نه‌ك ده‌سه‌ڵات بگرنه‌ ده‌ست، له‌كاتێكدا له‌وڵاتانی تر، بۆنمونه‌ له‌میسر، له‌زۆر وڵاتی دیكه‌ی‌ دنیا بزوتنه‌وه‌ ئیسلامگه‌راكان خه‌بات بۆ ده‌سه‌ڵات گرتنه‌ده‌ست ده‌كه‌ن، له‌عێراقیشدا هه‌روایه‌، به‌ڵام هیچ هێزێكی ئیسلامگه‌را له‌كوردستاندا نییه‌ باش بۆی ده‌رنه‌كه‌وتبێت، كه‌ له‌هه‌ڵبژاردنی ئازادیشدا ناتوانێت ده‌سه‌ڵات بگرێته‌ده‌ست. هه‌موو رێگاكانی‌ هه‌ڵبژاردن‌و شه‌ڕو تیرۆریشیان تاقیكرده‌وه‌و سودی‌ نه‌بوو.

چاودێر: له‌دوای هه‌ڵبژاردنه‌كانه‌وه‌ باس له‌مه‌سه‌له‌ی هێوركردنه‌وه‌ی بارودۆخی نێوان لایه‌نه‌كان به‌تایبه‌ت یه‌كێتی‌و گۆڕان ده‌كرێت، رای ئێوه‌ له‌وباره‌یه‌وه‌؟

مه‌لا به‌ختیار:
بێگومان وه‌كو مه‌كته‌بی سیاسی، له‌سه‌ر ئه‌م مه‌سه‌له‌یه‌ قسه‌مان كردوه‌، پیاوی جوامێر له‌نێواندا هه‌بوه‌و قسه‌ی هه‌ردولای ئاڵوگۆڕپێكردوه‌، ئێمه‌ قسه‌كه‌مان وابوه‌ كه‌ ئه‌گه‌ر ئه‌وان هه‌نگاوێك بێنه‌ پێشه‌وه‌، بێگومان ئێمه‌ش كه‌متر ناچینه‌ پێشه‌وه‌. ئه‌گه‌ر نه‌هجی سیاسی خۆیان له‌سه‌رئاستی عیراق به‌پێی ئه‌ركه‌كانی دیموكراسی‌و نه‌ته‌وه‌یی عێراقی‌‌و كوردستانی‌ بگونجێنن، هه‌ڵبه‌ته‌ زۆرمان پێ خۆشده‌بێت، ته‌نانه‌ت مه‌سه‌له‌ی كاندیدكردنی مام جه‌لال ده‌نگی بده‌نێ یان نه‌ده‌نێ، نه‌مانكردوه‌ به‌مه‌رج، به‌ڵام من ده‌پرسم: سه‌ره‌ڕای هه‌مو جیاوازییه‌كانمان ئایه‌ ده‌شێ، بۆنمونه‌ ره‌وتی سه‌در ده‌نگ به‌مام جه‌لال بدات (كه‌ ئێمه‌ له‌گه‌ڵ ره‌وتی سه‌دردا له‌ڕوی بیروباوه‌ڕو دیموكراسییه‌وه‌ له‌وان جیاوازین) ده‌شێ له‌ناو په‌رله‌مانێكدا كاندیده‌كانی ره‌وتی سه‌در، یان كاندیده‌كانی ره‌وته‌ توندڕه‌كانی تر، ده‌نگ به‌مام جه‌لال بده‌ن، به‌ڵام لیستی گۆڕان ده‌نگ به‌مام جه‌لال نه‌دات، ئه‌گه‌ر پاساو ئیجرائاته‌ كه‌ كراوه‌ به‌رامبه‌ر به‌وانه‌ی‌ له‌شیان لای‌ ئێمه‌یه‌و سه‌ریان له‌گرده‌كه‌یه‌، من ده‌پرسم خۆ یه‌كێتی ئێستایش كێشه‌ی هه‌یه‌ له‌گه‌ڵ ده‌یان‌و سه‌دان به‌رپرس‌و كادرو عه‌سكه‌ری‌ ئه‌وان، كه‌ مومته‌له‌كاتی یه‌كێتییان له‌لایه‌، له‌گه‌ڵ‌ ئه‌وانه‌یان كه‌ وه‌كو شانه‌ی نوستو، له‌ناو هێزی چه‌كدار و له‌ناو پۆلیس ئیشده‌كه‌ن، له‌گه‌ڵ‌ ئه‌وه‌ی‌ ته‌واوی ئه‌و سیاسه‌ته‌ی ئه‌وانمان قبوڵ نییه‌ كه‌ له‌گه‌ڵ ئوسامه‌ نوجێفی دانیشتون، له‌گه‌ڵ به‌ره‌ی توركمانی دانیشتون، له‌دوای هه‌ڵبژاردنیش وه‌فدێكیان ده‌چێت بۆ دیاله‌ داوای هاتنی سوپای‌ عیراق بۆ خانه‌قین ده‌كات، به‌ڵام له‌گه‌ڵ ئه‌وه‌شدا ده‌ڵێین: وه‌رن گفتوگۆ هه‌بێت له‌به‌ینماندا، شێوه‌یه‌كیش له‌ڕێكه‌وتن هه‌بێت له‌به‌ینماندا له‌سه‌رئاستی عیراق، چونكه‌ مه‌سه‌له‌كه‌ یه‌كێتی‌و گۆڕان نییه‌ له‌م مه‌سه‌له‌یه‌دا، مه‌سه‌له‌كه‌ كوردو كوردایه‌تییه‌، مه‌سه‌له‌كه‌ ناوچه‌ كێشه‌ له‌سه‌ره‌كانه‌، واته‌ ئێمه‌ بۆیه‌ ده‌ڵێین با بێن له‌سه‌ر هه‌ندێ خاڵ له‌سه‌ر ئاستی‌ عیراق رێكبكه‌وین، له‌به‌رئه‌وه‌ی له‌سه‌ر زۆر خاڵ له‌كوردستاندا ناكۆكین، خۆ نه‌مانوتوه‌ هیچ خاڵێكی ناكۆكی نامێنێت له‌به‌ینماندا.

چاودێر: كه‌واته‌ ئێستا ئه‌و پرده‌ی كه‌ جه‌نابت باسیده‌كه‌یت، خه‌ریكه‌ دروست ببێت، یان هیوا هه‌یه‌ دروست ببێت؟
مه‌لا به‌ختیار:
هه‌وڵ هه‌یه‌، ئێمه‌ به‌شبه‌حاڵی خۆمان هه‌وڵه‌كه‌مان پێ‌خۆشه‌، كه‌سیش له‌مه‌كته‌بی‌ سیاسی‌ دژی‌ هه‌وڵه‌كان نه‌بووه‌. هه‌مو لایه‌كیش ده‌زانێ كه‌ ئێستا بارگرژی نێوانمان وه‌كو سه‌رده‌می هه‌ڵبژاردن نییه‌، ئه‌و كۆبونه‌وانه‌ی به‌ڕێز سه‌رۆكی هه‌رێمی كوردستان كردویه‌تی، چوین بۆ كۆبونه‌وه‌كه‌، ئه‌و رێككه‌وتنه‌ مه‌بده‌ئیه‌ی كه‌ كرا له‌یه‌كه‌مین كۆبونه‌وه‌ی هێزه‌ سیاسییه‌كان له‌گه‌ڵ به‌ڕێز سه‌رۆكی هه‌رێمدا، ئێمه‌ رازیبوین، سه‌رۆكی‌ هه‌رێم خۆی‌ رێكه‌وتنه‌كه‌ی‌ به‌ئاماده‌بونی‌ نوێنه‌رانی‌ هه‌موو لایه‌نه‌كان راگه‌یاند، كه‌چی‌ به‌داخه‌وه‌ له‌دوای 12 سه‌عات براده‌رانی گۆڕان په‌شیمانبونه‌وه‌و به‌رپرسێكیان هاته‌ سه‌ر ته‌له‌فزیۆن‌و وتی: ئێمه‌ هه‌ڵه‌مان كردوه‌ كه‌ موافه‌قه‌تمان كردوه‌ یه‌ك كوتله‌بین، پێم سه‌یره‌ مه‌سئولێك له‌دوای ته‌جروبه‌یه‌كی سیاسی‌ ده‌یان ساڵه‌، له‌گفتوگۆیه‌كدا كه‌ گفتوگۆیه‌كی سیاسی‌ ئاسایی بوه‌، له‌سه‌ر پرنسیپه‌كان رێك ده‌كه‌وێ‌، به‌ڵام دوای 12 سه‌عات بڵێت هه‌ڵه‌م كردوه‌، كه‌ ئه‌مه‌ ئه‌وه‌ ده‌گه‌یه‌نێ‌ بزوتنه‌وه‌كه‌یان كه‌ جارێ هیچ دسپلینێك له‌ناویاندا نییه‌، له‌به‌رامبه‌ر رێككه‌وتنێكی ئاسایی بۆ میلله‌ته‌كه‌مان پاشگه‌زده‌بنه‌وه‌، له‌به‌رئه‌وه‌ی‌ ناڕه‌زاییه‌كی‌ زۆر له‌ناویاندا دژی‌ رێكه‌وتنه‌كه‌ وروژاوه‌. ئه‌مه‌ش سه‌ره‌نجامی‌ ئه‌و په‌روه‌رده‌و رق‌و كینه‌یه‌یه‌ كه‌ له‌دوو ساڵی‌ رابوردودا، له‌ناو جه‌ماوه‌رو كادره‌كانیان بێ‌سنور چاندویانه‌، بۆیه‌ ته‌نانه‌ت رێكه‌وتنێكی‌ ئاساییشیان پێ‌ قوت ناچێ‌‌و پێیان كۆنترۆڵ ناكرێ.

چاودێر: ده‌وترێ هۆكارێكی گۆڕینی ئه‌و هه‌ڵوێسته‌، دروستبونی ده‌سته‌گه‌رییه‌ له‌ناو گۆڕاندا كه‌ ئێستا خه‌ریكه‌ ده‌بێته‌ بزوتنه‌وه‌یه‌كی رێكخراو، ئێوه‌ ده‌ڵێن چی؟

مه‌لا به‌ختیار:
ئه‌م ناكۆكییه‌ له‌ناو لیستی گۆڕان ئێستا زه‌ق بۆته‌وه‌، ئه‌گینا له‌وه‌ته‌ی چه‌كه‌ره‌یان كردوه‌ به‌ناڕێكییه‌وه‌ چه‌كه‌ره‌یان كردوه‌، ئه‌وه‌ نه‌بێت ئه‌مانه‌ ره‌وتێكی گونجاوی بێ كێشه‌و بێ ناكۆكی بوبن، دیاره‌ ئه‌وه‌نده‌ی سۆزی سیاسی له‌سه‌ره‌تاوه‌ ئه‌مانی كۆكردبۆوه‌، ئه‌وه‌نده‌ بنچینه‌ پرنسیپه‌كانی‌ ئه‌و بزوتنه‌وه‌یه‌ كۆینه‌كردبونه‌وه‌، چونكه‌ ئه‌وان له‌سه‌ر فه‌لسه‌فه‌ی خه‌بات، له‌سه‌ر ئایدیۆلۆژیه‌تی كار، له‌سه‌ر په‌یكه‌ره‌ی چۆنیه‌تی‌ رێكخستنی‌ خه‌ڵكه‌كه‌یان په‌یڕه‌وێكیان نه‌بوو. دانیشتبن قسه‌ بكه‌ن له‌سه‌ر ئه‌و مه‌سه‌لانه‌ بۆئه‌وه‌ی بزانن كۆكن یان ناكۆكن؟ چونكه‌ هه‌میشه‌ هێزه‌ سیاسییه‌كان له‌سه‌ر ورده‌كاریی ناكۆكی ده‌كه‌وێته‌ به‌ینیانه‌وه‌، شه‌یتانی‌ ناكۆكی‌ له‌ورده‌كاریه‌كاندایه‌. حزبی واهه‌یه‌ له‌سه‌ر بڕگه‌یه‌ك له‌په‌یڕه‌وی ناوخۆ دوبه‌ره‌كی كه‌وتۆته‌ ناوی، كاتی خۆی (بولشه‌ویك‌و مه‌نشفیك) له‌حزبی سۆسیال دیموكراتی روسیا، له‌سه‌ر بڕگه‌یه‌كی‌ په‌یڕه‌وی ناوخۆ دووبه‌ره‌كی‌ كه‌وته‌ به‌ینیانه‌وه‌، بۆیه‌ ده‌بینین ئه‌و ناكۆكییه‌ی ناو بزوتنه‌وه‌ی گۆڕان كه‌ له‌ناویاندا ورده‌ ورده‌ زه‌قده‌بێته‌وه‌و ئێستا كه‌وتۆته‌ سه‌ر رۆژنامه‌و گۆڤاره‌كان، له‌گه‌ڵ ئه‌وه‌شدا، ده‌بێت چاوه‌ڕێ بكه‌ین بزانین بیروباوه‌ڕه‌ جیاوازه‌كان چۆن دوابڕیار ده‌ده‌ن. یان چۆن چۆنی‌ چاره‌سه‌ریان ده‌كه‌ن.

چاودێر: كه‌واته‌ با بگه‌ڕێینه‌وه‌ بۆ پرسیاری پێشتر، به‌رونی پێمان بڵێیت، گه‌شبینی به‌هێوربونه‌وه‌ی بارودۆخه‌كه‌ی نێوان یه‌كێتی و گۆڕان؟

مه‌لا به‌ختیار:
دیاره‌ وه‌كو مه‌لا به‌ختیار، له‌دواسه‌ره‌نجامی ناكۆكی‌ نێوانمان، سه‌ره‌ڕای‌ دووری‌ ئێستامان، گه‌شبینم، چونكه‌ ئێستاش نه‌توانین رێكبكه‌وین، بێگومان ماوه‌یه‌كی تر هه‌رده‌بێت وه‌كو دوو لایه‌ن جۆرێك له‌ ڕێكه‌وتن هه‌بێت له‌ناوماندا، دیاره‌ رێككه‌وتن به‌و مانایه‌ نییه‌ ناكۆكییه‌كانمان نامێنێ، بیروبۆچونی ساده‌ی ئه‌وتۆ هه‌یه‌ كه‌ پێیوایه‌ ئه‌گه‌ر به‌رگری له‌حزبه‌كه‌ت بكه‌یت، ئه‌مه‌ ناكۆییه‌كان قوڵتر ده‌بێ‌، ئه‌مه‌یان وانییه‌، من پێموابێت ئه‌وه‌ی به‌رگری ده‌كات باشتر ئاماده‌یه‌ رێكبكه‌وێت، نه‌ك ئه‌وه‌ی به‌رگری ناكات، ئه‌وه‌ی به‌رگری ناكات هه‌لپه‌رسته‌، واته‌ تێكۆشه‌ر به‌رگری له‌رێبازو بیروباوه‌ڕی‌ حزبه‌كه‌ی نه‌كات، به‌ڕاستی ئه‌مه‌ له‌هه‌لپه‌رستی به‌ولاوه‌ هیچ جۆره‌ سیاسه‌تێكی راستی‌ تیانییه‌، سه‌ركردایه‌تی‌ حیزبه‌كان، گه‌ر له‌كاتی‌ شه‌ڕوشۆڕدا، یان له‌كاتی‌ ناكۆكی‌‌و دووبه‌ره‌كیدا، به‌رگری‌ له‌حیزبه‌كانیان نه‌كه‌ن، ئه‌ی‌ كاریان چییه‌ له‌سه‌ركردایه‌تیدا؟ ته‌نها كاریان ئه‌وه‌یه‌ قه‌واعید بخه‌نه‌ ناو ناكۆكیه‌كان‌و ململانێكان‌و خۆیان ده‌ست به‌كڵاوی‌ هه‌لپه‌رستیه‌وه‌ بگرن، بای‌ به‌رژه‌وه‌ندی‌ نه‌یبات!

چاودێر: ده‌وترێ كۆنگره‌ی یه‌كێتی ده‌سه‌ڵاتی ئه‌وه‌ی هه‌یه‌، رێككه‌وتنی ستراتیژیی نێوان یه‌كێتی‌و پارتی هه‌ڵوه‌شێنێته‌وه‌، له‌لایه‌كیتره‌وه‌ له‌ماوه‌ی رابرودودا راپۆرته‌كه‌ی "گوڵان"، هه‌ندێ بارگرژی دروستكرد، رای ئێوه‌ له‌وباره‌یه‌وه‌ چییه‌؟

مه‌لا به‌ختیار:
له‌دانیشتنه‌كاندا كه‌ هه‌ڤاڵ به‌رهه‌م له‌گه‌ڵ جه‌نابی سه‌رۆكی هه‌رێم دانیشتوه‌، به‌ڕێز سه‌رۆكی هه‌رێم كاك به‌رهه‌می دڵنیاكرده‌وه‌ كه‌ ئه‌و راپۆرته‌ بێ ئاگاداری پارتی كراوه‌، رونكردنه‌وه‌كه‌ی به‌ڕێز مه‌كته‌بی سیاسی پارتی، له‌گه‌ڵ به‌ڕێز نێچیرڤان بارزانی، پێموابێت به‌سه‌ بۆئه‌وه‌ی ئێمه‌ وه‌كو دو حزب به‌رامبه‌ر به‌یه‌ك تێبگه‌ین كه‌ نوسینه‌كه‌ی‌ گوڵان سیاسه‌تی ره‌سمی ئه‌و حزبه‌ به‌رامبه‌ر به‌كاك به‌رهه‌م نییه‌، له‌لایه‌كی تره‌وه‌، له‌م فه‌وزایه‌ی رۆژنامه‌نوسیه‌دا، هه‌ندێجار گۆڤارو رۆژنامه‌ مولته‌زیمه‌كانیش به‌رزونزم ده‌نوسن، بۆئه‌وه‌ی به‌رتیل بده‌ن به‌رۆژنامه‌ ئه‌هلییه‌كان، بڵێن ئه‌وه‌نییه‌ ئێمه‌ش له‌نوسیندا سه‌ربه‌ستین ، بۆیه‌ به‌شبه‌حاڵی خۆم دوای رونكردنه‌وه‌كان سه‌باره‌ت به‌سیاسه‌تی پارتی به‌رامبه‌ر به‌كاك به‌رهه‌م، هیچ نیگه‌رانییه‌كم نه‌ما.
سه‌باره‌ت به‌مه‌سه‌له‌ی رێككه‌وتننامه‌ی ستراتیژی؛ كۆنگره‌ ده‌سه‌ڵاتی هه‌یه‌ یه‌كێتیی نیشتمانیی كوردستان هه‌ڵوه‌شێنێته‌وه‌، چ جای رێككه‌وتنێك، چونكه‌ كۆنگره‌ باڵاترین ده‌سه‌ڵاته‌، به‌ڵام ئه‌گه‌ر بڕیاربێت یه‌كێتی بمێنێت، سه‌ركردایه‌تی هه‌بێت، هاوپه‌یمانێتی بۆ یه‌كێتی گرنگ بێت، بێگومان دڵنیام یه‌كه‌مین حزب ده‌بێت هاوپه‌یمانی له‌گه‌ڵ ببه‌ستین، پارتی دیموكراتی كوردستانه‌، ئه‌گه‌ریش له‌سه‌ر هاوپه‌یمانێتییه‌كه‌ قسه‌یه‌كیان هه‌بیت، بۆیان هه‌یه‌ داوابكه‌ن هاوپه‌یمانێتییه‌كه‌ بخوێنرێته‌وه‌و له‌سه‌ر فه‌قه‌ره‌یه‌ك قسه‌یه‌كیان هه‌بێت یان پێش و پاش بخرێت، یان شتێك ئیزافه‌ بكرێت، ئه‌مه‌ش شتێكی ئاساییه‌. به‌ڵام به‌بێ په‌سه‌ندی پارتیش ناكرێ.

چاودێر: پێتوایه‌ كۆنگره‌ی داهاتوی یه‌كێتی، كه‌ بڕیاروایه‌ له‌1/6دا ئه‌نجامبدرێت، گۆڕانكاری له‌ناو ئۆرگانه‌كانی یه‌كێتیدا دروستبكات؟

مه‌لا به‌ختیار:
به‌ش به‌حاڵی‌ خۆم پێموایه‌ گۆڕانكاری‌ له‌هه‌موو ئاسته‌كاندا، بۆ یه‌كێتی‌‌و جه‌ماوه‌ره‌كه‌ی‌، بۆته‌ ئه‌ركێكی‌ مێژوویی‌. خۆلادان له‌م راستییه‌، لادانه‌ له‌چاره‌نوسسازترین ئه‌ركی‌ حیزبی‌‌و سیاسی‌. له‌به‌رئه‌وه‌ قسه‌ له‌سه‌ر پره‌نسیپی‌ گۆڕانكاری‌ نییه‌. به‌ڵام هه‌قوایه‌ قسه‌ له‌سه‌ر شێوه‌و گه‌وهه‌ری‌ گۆڕانكاری‌ بكرێ‌. من له‌گه‌ڵ‌ گۆڕانكاری‌ ئه‌قڵانیدام. له‌گه‌ڵ‌ كوده‌تای‌ گۆڕانكاری‌ نیم. گۆڕانكاری‌ نه‌ تۆڵه‌سه‌ندنه‌وه‌یه‌و نه‌ رق رشتنه‌و نه‌ شه‌ڕی‌ پله‌وپایه‌شه‌. گۆڕانكاری‌ به‌وه‌ تێده‌گه‌م كه‌وا:
چۆن پرۆگرامی‌ یه‌كێتیی‌ له‌گه‌ڵ‌ گۆڕانكارییه‌كانی‌ سه‌رده‌م ده‌گونجێنین؛ چۆن په‌یڕه‌وی‌ ناوخۆی‌ ده‌كه‌ینه‌ په‌یڕه‌وێكی‌ هاوچه‌رخ؛ چۆن په‌یكه‌ره‌ی‌ رێكخستن‌و ئۆرگانه‌كانی‌ یه‌كێتیی‌ به‌ره‌و كرانه‌وه‌یه‌كی‌ ئازادتر، به‌بێ‌ له‌ده‌ستدانی‌ مه‌ركه‌زیه‌ت‌و مه‌رجه‌عیه‌ت داده‌ڕێژینه‌وه‌؛ هه‌روا گۆڕانكاری‌ به‌وه‌ تێده‌گه‌م كه‌وا:
له‌سێهه‌مین كۆنگره‌شدا، ته‌سكیه‌ی‌ هیچ ئه‌ندامێكی‌ سه‌ركردایه‌تی‌ نه‌مێنێ‌، سه‌پاندنه‌وه‌ی‌ هیچ لیستێكی‌ سه‌ركردایه‌تی‌ نه‌مێنێ‌، سه‌ركردایه‌تی‌ به‌پێی‌ لێوه‌شاوه‌یی‌، به‌پێی‌ فكری‌ سیاسی‌، به‌پێی‌ پابه‌ندی‌ به‌پرۆگرام‌و په‌یڕه‌وی‌ ناوخۆ، به‌پێی‌ ئاستی‌ وشیاری‌ شیاو، به‌پێی‌ تواناو دڵسۆزی‌ سه‌ركرده‌ بۆ په‌ره‌پێدانی‌ یه‌كێتیی‌‌و له‌كاتی‌ كێشه‌و بێشه‌شدا، ئاماده‌بێ‌ به‌رگری‌ له‌یه‌كێتیی‌ بكات، ده‌بێ‌ سه‌ركردایه‌تی‌ هه‌ڵبژێردراوی‌ سێهه‌مین كۆنگره‌، چ ژن‌و چ پیاو، هه‌روه‌ها چ لاوان، ده‌بێ‌ ئه‌و پرنسیپ‌و پێوانانه‌ بیانگرێته‌وه‌، نه‌ك پێوانه‌كانی‌ یه‌كه‌مین‌و دووه‌مین كۆنگره‌.

چاودێر: هیچ پرۆژه‌یه‌كی پێشنیاركراو هه‌یه‌ بۆ كۆنگره‌، تا كاری له‌سه‌ربكرێت، به‌تایبه‌ت بۆ مه‌كته‌ب‌و مه‌ڵبه‌ندو ئۆرگانه‌كانی تر؟

مه‌لا به‌ختیار:
تائێستا له‌سه‌ر په‌یڕه‌و پرۆگرام، له‌سه‌ر په‌یكه‌ره‌ی‌ یه‌كێتی، به‌ڵێ پرۆژه‌ هه‌یه‌، دو ساڵ زیاتره‌ هه‌ندێك بیروڕا گه‌ڵاڵه‌كراون، بۆئه‌و مه‌به‌سته‌ كاتی خۆی كوردستانی نوێ پاشكۆو سایتی كۆنگره‌ی هه‌بو، له‌سه‌ر ته‌له‌فزیۆن قسه‌ له‌سه‌ر ئه‌و بابه‌تانه‌ كراوه‌، پێموایه‌ یه‌كێتیی له‌دوو سێ ساڵی رابردودا ئه‌و بواره‌ی‌ داویه‌تی به‌قه‌واعیدی خۆی، باوه‌ڕناكه‌م هیچ حزبێك ئه‌م بواره‌ی بۆ قه‌واعیده‌كه‌ی‌ ره‌خساندبێت؛ ئه‌وه‌ی كه‌ تاقه‌تی قسه‌كردنی له‌سه‌ر فكر، پرۆگرام، په‌یڕه‌و و ئۆرگان هه‌بوبێت، بواری پێدراوه‌ بیروبۆچونی خۆی به‌وپه‌ڕی ئازادی ده‌ربڕیوه‌، ئه‌م هه‌مو بیروبۆچونانه‌، ئه‌م هه‌مو پرۆژه‌و گه‌ڵاڵانه‌ بێگومان له‌كاتی‌ كۆنگره‌دا به‌شێكی باشی په‌سه‌ندده‌كرێت.

چاودێر: هه‌ندێ له‌ئه‌ندامانی كۆمیته‌ی سه‌ركردایه‌تیی یه‌كێتی له‌گه‌ڵ ئه‌وه‌دا نین كۆنگره‌ له‌1/6دا ببه‌سترێت، هۆكاره‌كه‌ی چییه‌؟

مه‌لا به‌ختیار:
پاساوی ئه‌وكه‌سانه‌ له‌هه‌قیقه‌تدا ئه‌وه‌یه‌ كه‌ ده‌ترسن كۆنگره‌یه‌كی سه‌ركه‌وتو نه‌بێت، ئه‌و رایه‌ش له‌وه‌وه‌ سه‌رچاوه‌ی گرتوه‌ كه‌ یه‌كێتی هێشتا كێشه‌ی چاره‌سه‌ر نه‌كراوی‌ كێشه‌ی هه‌ناوی‌ هه‌یه‌ ، ئه‌م مه‌ترسییه‌ له‌پێش پلنیۆمیشدا هه‌بو، به‌ڵام پلنیۆم هه‌تاڕاده‌یه‌كی‌ به‌رچاو سه‌ركه‌وتوبو، به‌شبه‌حاڵی خۆم ئه‌و مه‌ترسییانه‌م كه‌متر هه‌یه‌. پێشموایه‌ كاتمان به‌ده‌سته‌وه‌یه‌ له‌ئێستاوه‌ تا كۆنگره‌، هه‌م له‌گه‌ڵ جه‌نابی مام جه‌لال، هه‌م له‌ناو مه‌كته‌بی سیاسیدا، هه‌م له‌گه‌ڵ سه‌ركردایه‌تی و هه‌م له‌گه‌ڵ ئۆرگانه‌كاندا بتوانین هه‌رچی‌ له‌تواناماندایه‌ له‌و كێشانه‌ی كه‌ مه‌ترسیمان لێیان هه‌یه‌ له‌ناو كۆنگره‌دا، پێش كۆنگره‌ ده‌توانین هه‌وڵی‌ چاره‌سه‌ركردنیان بده‌ین. هه‌روه‌ها له‌به‌رامبه‌ر ئه‌ندامانی كۆنگره‌دا په‌یمانێكی تۆكمه‌تر بده‌ین كه‌ ده‌توانین ئه‌و كێشانه‌ چاره‌سه‌ربكه‌ین. به‌ڵكو كۆنگره‌ ده‌توانێ‌ مه‌رجی‌ قورس بۆ به‌رگریكردن له‌سیاسه‌تی‌ ناوخۆی‌ حیزبایه‌تیمان دابنێ‌ كه‌ هه‌ركه‌سێك له‌په‌یڕه‌و لابدات، لاببرێ‌. به‌ڵام شیاوترین سیاسه‌ت ئه‌وه‌یه‌ بوار نه‌ده‌ین كێشه‌ی‌ چاوه‌ڕوان نه‌كراو له‌ناوماندا قوڵتر ببێ‌.

چاودێر: هه‌ر سه‌باره‌ت به‌كۆنگره‌، مام جه‌لال له‌چاوپێكه‌وتنێكدا له‌گه‌ڵ كه‌ناڵی ئه‌لعه‌ره‌بیه‌ ئاماژه‌ی به‌وه‌كرد، ئه‌گه‌ر ببێته‌وه‌ به‌سه‌رۆككۆمار، ره‌نگه‌ كۆنگره‌ یه‌كێك له‌جیاتی سكرتێری گشتی دابنێ، تاكو كاره‌كانی یه‌كێتی به‌ڕێوه‌ببات؟

مه‌لا به‌ختیار:
كۆنگره‌ هه‌مو ده‌سه‌ڵاتێكی هه‌یه‌، ئه‌گه‌ر ئه‌وه‌ پێشنیاری جه‌نابی مام جه‌لال بێت، بێگومان به‌حوكمی ئه‌وه‌ی له‌هه‌مومان به‌ته‌جروبه‌ترو له‌هه‌مومان قوڵتره‌ له‌و مه‌سه‌لانه‌، پێگه‌شی له‌به‌غداد گه‌یاندبێتیه‌ ئه‌و باوه‌ڕه‌ كه‌ پێویست به‌كارێكی واده‌كات له‌كۆنگره‌، ده‌بێت له‌كۆنگره‌ ته‌رحی بكات و ئه‌و بیروبۆچونه‌ رونكاته‌وه‌، به‌هیوای ئه‌وه‌ی ئه‌گه‌ر له‌قازانجی یه‌كێتی بێت، كۆنگره‌ دوای‌ مشت‌وماڵكردنی‌، په‌سه‌ندی‌ بكات.

چاودێر: له‌ڕاگه‌یاندنه‌ جیهانییه‌كاندا، كاتێك باسی یه‌كێتی ده‌كرێت ده‌وترێت حزبی سه‌رۆككۆمار، به‌ڵام هه‌ندێك پێیانوایه‌ مام جه‌لال بۆ یه‌كێتیش زۆر زه‌روره‌، ئه‌وكاته‌ی كه‌ له‌به‌غداد ده‌بێت زیان به‌ر یه‌كێتی ده‌كه‌وێت، ئێوه‌ ئه‌و بۆشاییه‌ چۆن پڕده‌كه‌نه‌وه‌؟

مه‌لا به‌ختیار:
من كاتی خۆی وتارم له‌سه‌ر ئه‌و مه‌سه‌له‌یه‌ نوسیوه‌، كه‌ چونی مام جه‌لال بۆشاییه‌ك بۆ یه‌كێتیی دروستده‌كات، مه‌ترسییه‌كانی ئه‌و بۆشاییه‌م باسكردوه‌ كه‌ ده‌بێت زۆر وریای بین، دیاره‌ بونی مام جه‌لال له‌كوردستان شتێكه‌و بونیشی له‌به‌غداد شتێكی تره‌، به‌ڵام من ده‌پرسم: ئایا بونی مام جه‌لال له‌به‌غداد بۆ ته‌واوی كێشه‌ی گه‌له‌كه‌مان، ته‌واوی مافه‌ دیموكراتییه‌كانی گه‌له‌كه‌مان، له‌وه‌ كاریگه‌رتر نه‌بو، وه‌كو سكرتێری یه‌كێتی بمابایه‌ته‌وه‌ له‌كوردستان؟ یان به‌چه‌شنێكی‌ تر بیری لێبكه‌ینه‌وه‌، یه‌كێتی ئامرازه‌ بۆ به‌دیهێنانی ئامانجی گه‌له‌كه‌مان، یاخود یه‌كێتی خۆی ئامانجه‌؟ ئه‌گه‌ر یه‌كێتی ئامڕازه‌ بۆ به‌دیهێنانی ئامانجه‌كان، پۆستێكی سیادی زۆر گه‌وره‌مان ده‌ستكه‌وتوه‌ له‌به‌غداد بۆئه‌وه‌ی ئه‌و ئامانجانه‌ به‌دیبهێنین، ئه‌و پۆسته‌ش ده‌درێت به‌سكرتێره‌كه‌مان، ئێمه‌ چۆن ئه‌م ده‌رگایه‌ له‌خۆمان داده‌خه‌ین؟
!
چاودێر: ده‌وترێ، له‌كۆنگره‌دا مه‌كته‌به‌كانی كۆمه‌ڵایه‌تی، مافی مرۆڤ، بیروهۆشیاری نامێنن؟
مه‌لا به‌ختیار:
ئه‌م قسانه‌ هه‌موی هه‌یه‌، به‌ڵام كۆنگره‌ چه‌ندی قبوڵده‌كات، ئه‌مه‌ دوابڕیاره‌.

چاودێر: ئه‌ی سه‌باره‌ت به‌راگه‌یاندنی یه‌كێتی، تا چه‌ند له‌ئیشوكاره‌كانیان رازین، له‌كاتێكدا هه‌ندێ له‌به‌رپرسانی یه‌كێتی گله‌ییان لێی هه‌یه‌؟

مه‌لا به‌ختیار
: به‌شبه‌حاڵی خۆم رازیم، به‌ڵام ده‌زگای راگه‌یاندنیش، هه‌روه‌كو مه‌كته‌بی رێكخراوه‌كان و مه‌كته‌بی رێكخستنیش پێویستی به‌گۆڕانكارییه‌، مه‌كته‌بی ناوه‌ندیی راگه‌یاندن یه‌كێك بوه‌ له‌مه‌كته‌به‌ تێكۆشه‌ره‌ كۆڵنه‌ده‌ره‌كان، به‌فكر، به‌سیاسه‌ت، به‌ئه‌قڵ و به‌مه‌نتق، به‌رگری له‌یه‌كێتیی كردوه‌، هه‌ڵوێستی هه‌بوه‌، ئه‌و ئۆباڵه‌ی كه‌ كۆنگره‌ خستویه‌ته‌ ئه‌ستۆی مه‌كته‌بی راگه‌یاندن، ده‌توانم بڵێم یه‌كێك بوه‌ له‌پێشه‌وه‌ی مه‌كته‌به‌كان رایپه‌ڕاندوه‌. به‌ڵام مه‌سئول هه‌یه‌ ئه‌مه‌ قبوڵناكات، مه‌سئول هه‌یه‌ خۆی موحافیزكاره‌، مه‌سئول هه‌یه‌ به‌درێژایی 17-18 ساڵی رابردو یه‌كێتی شه‌ڕی له‌گه‌ڵ پارتی كردبێت، شه‌ڕی له‌گه‌ڵ ئیسلامی كردبێت، ناكۆكی له‌گه‌ڵ گۆڕان هه‌بوبێت، ناكۆكی له‌گه‌ڵ هه‌ر لایه‌كی تر هه‌بوبێت، هیچ لایه‌كی‌ له‌و لایه‌نانه‌ له‌خۆی‌ زویر نه‌كردووه‌. كه‌چی‌ ره‌خنه‌ش له‌راگه‌یاندن‌و به‌رپرسه‌ بوێره‌كانی‌ یه‌كێتی له‌سه‌ر به‌رگریكردن له‌یه‌كێتی‌ ده‌گرێ‌. ئاخر چۆن ئێستا راگه‌یاندن قه‌رزاربار ده‌رده‌چێت؛ خۆ ئه‌گه‌ر پێشكه‌وتنی میدیاو راگه‌یاندن له‌دوای‌ دوه‌مین كۆنگره‌وه‌ جۆرێك له‌گۆڕانكاری‌ بۆ راگه‌یاندنی‌ یه‌كێتیی‌ له‌ڕووی‌ بابه‌تیه‌وه‌ پێویست بێ‌، ئه‌مه‌ش نابێت له‌سه‌ر حسابی ئه‌و خزمه‌ت‌و هه‌وڵه‌ بێت كه‌ راگه‌یاندنی یه‌كێتی‌ پێشكه‌شی‌ كردووه‌.

چاودێر: سه‌باره‌ت به‌پۆستی جێگری سه‌رۆكی هه‌رێم به‌پێی رێككه‌وتنی ستراتیژی، ده‌بێت بۆ یه‌كێتی بێت‌و له‌لایه‌ن سه‌رۆكی هه‌رێمه‌وه‌ ده‌ستنیشانبكرێت، بۆ تائێستا دوای شه‌ش مانگ له‌هه‌ڵبژاردنی سه‌رۆكی هه‌رێم، جێگر دیارینه‌كراوه‌؟

مه‌لا به‌ختیار
: له‌ڕاستیدا ئه‌وه‌ په‌یوه‌ندی به‌كۆمه‌ڵێك ئیعتیباراتی كه‌سێتی‌‌و سیاسییه‌وه‌ هه‌یه‌، كه‌ پێمانوابوه‌ جارێ ئه‌گه‌ر دوایبخه‌ین زه‌ره‌رمان نییه‌، نه‌ زیان له‌ڕێككه‌وتنه‌ ستراتیژییه‌كه‌مان ده‌دات، نه‌ له‌و هه‌لومه‌رجه‌ سیاسیه‌ی له‌هه‌ڵبژاردندا روبه‌ڕومان بۆوه‌، دوچاری‌ گرفت ده‌بین، بۆیه‌ وتومانه‌ با جارێ دوایبخه‌ین. به‌ڵام پله‌یه‌كی‌ مافی خۆمانه‌‌و ده‌ستبه‌رداری‌ نه‌بوین. داواشمان لێ نه‌كراوه‌ ده‌ست به‌رداری‌ بین.

چاودێر: گۆڕان ده‌ڵێن: سه‌رۆكی‌ هه‌رێم گفتی‌ داونه‌تێ‌ ده‌ركراوه‌كان بگێڕێته‌وه‌ سه‌ر كاره‌كانیان؟
مه‌لا به‌ختیار:
ئێمه‌، جگه‌ له‌كادرو پێشمه‌رگه‌، كه‌ كادرو پێشمه‌رگه‌ی‌ یه‌كێتیی‌ بون، یان فه‌رمانبه‌ری‌ ئۆرگانه‌گانی‌ یه‌كێتیی‌ بوون، موچه‌ی‌ كه‌سمان نه‌بڕیوه‌. ئه‌وانه‌ی‌ پاسه‌وانی‌ ئه‌ندامانی‌ مه‌كته‌بی‌ سیاسی‌‌و سه‌ركردایه‌تی‌ جارانی‌ یه‌كێتیی‌‌و ئێستای‌ ناو گۆڕانیشن، داوامان لێكردوون نه‌قڵ‌ ببن بۆ ئه‌ركی‌ عه‌سكه‌ری‌ دیكه‌، هه‌ندێكیان قبوڵیان كردووه‌، نه‌قڵ كراوون، ئه‌وه‌ی‌ قبوڵیشی‌ نه‌كردووه‌، بێگومان یاسای‌ به‌سه‌ردا جێ‌به‌جێ‌كراوه‌.
بۆ نانی‌ زیاتر له‌ 150 سه‌ركرده‌و فه‌رمانده‌ی‌ سه‌رگرده‌كه‌مان نه‌بڕیوه‌، كه‌ ئێستاش له‌حه‌وت ملیۆن دیناره‌وه‌ بۆ سێ ملیۆن دینار موچه‌ وه‌رده‌گرن، تیایاندایه‌ یه‌ك رۆژ فه‌رمانبه‌ر نه‌بووه‌، رۆژێكیش سه‌ركردایه‌تی‌ نه‌بووه‌، شه‌ڕی‌ له‌سه‌ر خانه‌نشینی‌ وه‌زیری‌ ده‌كرد، ئێستاش خانه‌نشینیه‌كه‌ وه‌رده‌گرێ‌، كه‌چی‌ ده‌ڵێ‌ دژی‌ گه‌نده‌ڵیم. هه‌ڵبژاردنی‌ ئه‌مجاره‌ش ده‌ریخست به‌هه‌زاران فه‌رمانبه‌رو موچه‌خۆر ده‌نگی‌ به‌گۆڕان داوه‌، كه‌سیش ده‌رنه‌كراوه‌.
سه‌رۆكی‌ هه‌رێم ئه‌گه‌ر له‌ڕێی‌ لیژنه‌وه‌ به‌ به‌ڵگه‌وه‌ سه‌لماندی‌، فه‌رمانبه‌ر، به‌مانای‌ فه‌رمانبه‌ری‌ راسته‌قینه‌ موچه‌ی‌ بڕاوه‌، هه‌قه‌ بیگێڕێته‌وه‌. له‌هه‌مان كاتدا ده‌پرسم: ئه‌گه‌ر پارتی‌، یان جه‌نابی‌ سه‌رۆكی‌ هه‌رێم له‌سه‌ر كادری‌ خۆی‌، له‌ناو سوپای‌ فه‌له‌ك دا، یان له‌ئاساییش‌و هێزی‌ پێشمه‌رگه‌دا، دڵنیابێ‌ خه‌ڵك هه‌بووه‌ ده‌نگی‌ به‌گۆڕان داوه‌، داوای‌ نه‌مانی‌ ئه‌م حكومه‌ته‌و دادگاییكردنی‌ كاربه‌ده‌ستان بكات، چی‌ لـێده‌كات؟ پاداشتی‌ ده‌كات یان سزای‌ ده‌دا؟

چاودێر: ئه‌گه‌ر شتێكتان مابێت، یان سه‌باره‌ت به‌"چاودێر" ئه‌گه‌ر سه‌رنجێكتان هه‌بێت؟
مه‌لا به‌ختیار:
به‌شبه‌حاڵی خۆم ده‌مه‌وێت به‌خوێنه‌ری "چاودێر" بڵێم، به‌ناوه‌ندی روناكبیریی و رۆژنامه‌نوسی بڵێم، من خۆم هیچ به‌رژه‌وه‌ندییه‌كی شه‌خسیم له‌پشتی چاودێره‌وه‌ نییه‌، له‌هه‌ر ململانێیه‌كی سیاسی له‌ناو حزبه‌كه‌ی خۆم و له‌ده‌ره‌وه‌ی حزبه‌كه‌ی خۆشمدا، روبه‌ڕوم بوبێته‌وه‌، قه‌ت داوام نه‌كردوه‌ له‌"چاودێر" وتارێك بۆ به‌رگری‌ له‌من بنوسێت، یان وتارێك دژی ئه‌وانه‌ بنوسن كه‌ دژی منیان نوسیوه‌، هه‌مو كه‌سێك ده‌زانێ رۆژانه‌ له‌سایته‌كان و له‌ڕۆژنامه‌كاندا له‌تایتڵ و لێكدانه‌وه‌كاندا، دو جار یان سێ جار ناوی من له‌ئارادا هه‌یه‌، هه‌موشی به‌ڕه‌خنه‌یه‌، خۆ ده‌شزانم كه‌ ئه‌مه‌ له‌به‌رئه‌وه‌یه‌ كه‌ من سازش له‌سه‌ر رێكخستنه‌كه‌ی خۆم و سه‌ركردایه‌تی خۆم و په‌یڕه‌و مه‌بادئی خۆم ناكه‌م، به‌ڵام ئه‌وه‌ "چاودێر" زۆربه‌ی كاره‌كانمان به‌ئێوه‌ سپاردوه‌، تاوه‌كو ئێستا من به‌ئێوه‌م وتوه‌ وتارێك به‌رگری‌ له‌من بكه‌ن؟ ئه‌مه‌ یه‌ك، دوه‌میش رۆژانه‌ من پێنج بۆ شه‌ش چالاكی‌و كۆبونه‌وه‌م هه‌یه‌، له‌هه‌فته‌یه‌كدا لانی كه‌م 70 تا 80 كۆبونه‌وه‌م هه‌یه‌، ته‌نانه‌ت یه‌كێكیش له‌و چالاكییانه‌ له‌رۆژنامه‌ی "چاودێر" بڵاوناكه‌مه‌وه‌، هه‌مو ره‌خنه‌یه‌كیشتان بۆهاتوه‌ له‌سه‌ر من بڵاوتانكردۆته‌وه‌، من ئێستایش ده‌یڵێم "چاودێر" هێڵی رۆژنامه‌گه‌ریی لیبڕاڵی مامناوه‌نجییه‌، نه‌ سه‌ر به‌ده‌سه‌ڵاته‌، نه‌ ته‌وه‌لاشه‌ له‌ده‌سه‌ڵات، راستییه‌كان وه‌كو خۆی ده‌بینێ و ده‌یڵێت، ئه‌مه‌م به‌په‌یامی "چاودێر"، زانیوه‌، تا له‌چاودێریش بمێنم چاودێر واده‌پارێزم، جگه‌له‌مه‌ هیچ په‌یامێكی تر و هیچ ئامانجێكی شه‌خسیم له‌ڕۆژنامه‌ی چاودێردا نییه‌، تكاشتان لێده‌كه‌م رۆژێك له‌ڕۆژان منیش لێره‌ نه‌بوم، وتارێك هات بۆ وه‌سفكردنی من، هه‌رگیز بڵاویمه‌كه‌نه‌وه‌، به‌پێچه‌وانه‌وه‌، وتارێك هات بۆ ره‌خنه‌گرتن له‌من، بڵاویبكه‌نه‌وه‌.

Start | Contact | PUKswed © 2018| Powerd by  Helanet Solutions
Home Contact