سه‌ره‌تا‌|ئێمه‌|پۆکسوید‌|که‌رته‌کان|هه‌واڵ‌|چالاکی|په‌یوه‌ندی
avataravataravatar
avatar
22 Mar 2011
جەلال مەلا مستەفا
ئەو ساتانەی مێژوو شایەتێکی بە ویژدانە بۆ سلێمانی زۆر گیان و ڕۆحی دەرچوو نەمر ئەبن.....
avatar
6 Mar 2011
وه‌ستا سه‌لام
به‌ بۆنه‌ی یاده‌وه‌ری ساڵ رۆژی ڕاپه‌رینی شاری هه‌ولێر
avatar
22 Feb 2011
فه‌رید ئه‌سه‌سه‌رد
خۆپیشاندان و دایه‌لۆگ و چاکسازیی
avatar
19 Feb 2011
هێمن حـەسـمەن/ ســوید
ئۆپۆزسیۆنی بێ سەرکردە!
avatar
19 Feb 2011
بورهان ئه‌مین
ڕێگرتن له ‌قه‌یران
avatar
19 Feb 2011
شادمان مه‌لا حه‌سه‌ن
ئارامی بۆ كۆمه‌لگاكه‌مان پێویسته‌
avatar
11 Feb 2011
به‌کرحه‌بیب
چۆن یه‌کێتی نیشتیمانی کوردستان بگەیەنینەوە لوتکە؟
avatar
24 Jan 2011
هێمن حـه‌سـه‌ن/ سوید
ئۆپۆزیسۆن و دەسەڵات لەناو کایە سیاسیەکاندا!
 
avatar

په‌یوه‌ندی یه‌كێتی‌‌و پارتی‌ له‌وه‌ ده‌رچوه‌ كه‌ شت به‌سه‌ر یه‌كتردا بسه‌پێنن

29 Jan 2010

هه‌ڤاڵ مه‌لابه‌ختیار کارگێر و وته‌بێژی مه‌کته‌بی سیاسی یه‌کێتیی نیشتمانیی کوردستان له‌ دیمانه‌یه‌کیدا له‌گه‌ڵ رۆژنامه‌ی ده‌ستوور، وه‌ڵامی ‌ کۆمه‌ڵێك پرسی هه‌نووکه‌یی و گه‌رماوگه‌رمی ئه‌مڕۆی ره‌وشی سیاسی کوردستان ده‌داته‌وه‌، ئێمه‌ش به‌ پێویستمان زانی بۆ خوێنه‌رانی سایته‌که‌مان ئه‌و ده‌قی وه‌رگێڕدراوه‌ی سایتی چاودێر بڵاوی کردۆته‌وه‌ ئێمه‌ش بۆ بڵاوی بکه‌ینه‌وه‌

:ئه‌مه‌ ده‌قی‌ چاوپێكه‌وتنه‌كه‌یه

ده‌ستوور: له‌دوای 25/7 راگه‌یاندنی ئه‌نجامی هه‌ڵبژاردنه‌كان سه‌ركردایه‌تی یه‌كێتی تووشی شۆككرد، یه‌كێتی بریاریدا پێداچوونه‌وه‌ به‌رێكخسته‌كانیدا بكات، هه‌نگاوه‌كانی‌ خۆ ڕێكخستنه‌وه‌ تاكوێ رۆیشتووه‌‌و چه‌ندی جێبه‌جێكراوه‌؟
مه‌لا به‌ختیار: له‌راستیدا ئێمه‌ كتومت چاوه‌روانی ئه‌و ئه‌نجامه‌ نه‌بووین، كه‌ له‌هه‌ڵبژاردندا رووبه‌روومان بوویه‌وه‌، دڵنیاشم هه‌مو لایه‌نه‌كان له‌پێشبینی ئه‌نجامی هه‌ڵبژاردنه‌كان كه‌م‌و زۆر به‌هه‌ڵه‌چوون، ئێمه‌ ئه‌مانزانی به‌رامبه‌ر به‌حكومه‌ت ناره‌زایی هه‌یه‌، ئه‌شمانزانی ناره‌زاییه‌كه‌ زیاد له‌قه‌باره‌ی خۆی له‌ناو خه‌ڵكدا به‌ مه‌زاجی سیاسی ئاشكرا‌و شاراوه‌ له‌ راگه‌یاندنه‌كاندا گه‌وره‌تر كراوه‌، به‌ڵام نه‌مانده‌زانی قه‌به‌كردنه‌كه‌ش له‌لای خه‌ڵك لێیان بۆته‌ راستی‌، ئه‌وه‌ی هه‌ڵه‌یه‌، هه‌ڵه‌یه‌. ئه‌وه‌ی گه‌نده‌ڵییه‌ به‌قه‌د ئه‌وه‌ی كه‌ هه‌یه‌ گه‌نده‌ڵییه‌، چونكه‌ تائێستا ده‌زگایه‌كی توێژینه‌وه‌ی زانیستی راده‌ی گه‌نده‌ڵیه‌كه‌ی ده‌ستانیشان نه‌كردووه‌، نه‌بانكی نێوده‌وڵه‌تی نه‌ هیچ، هیچ ده‌زگایه‌كی ئابووری، نه‌هیچ لیژنه‌یه‌كی ئابووری‌و ئیداری ده‌ستنیشانی راده‌ی گه‌نده‌ڵی‌و شێوه‌كه‌ی‌و سه‌رچاوه‌ی گه‌نده‌ڵییه‌كه‌، به‌پرسیاری گه‌نده‌ڵییه‌كه‌ له‌كوێوه‌یه‌ نه‌كردووه‌، به‌ڵام ئه‌م هه‌ڵمه‌تی پروپاگه‌نده‌ی دژایه‌تی حكومه‌ته‌ به‌و قه‌باره‌‌و قه‌به‌كراوییه‌ی كه‌باسی ده‌كه‌م، كارێكی كاتییه‌ له‌مێژوودا، حاڵه‌تێكی‌ سایكۆلۆژی دروستبوو به‌هۆی ئه‌و قه‌به‌كردنه‌ی كه‌باسی ده‌كه‌م، به‌و هۆیه‌شه‌وه‌ پاڵنه‌رێكی راسته‌وخۆ بوو بۆ ئه‌وه‌ی خه‌ڵك به‌و شێوه‌ی ده‌نگ بدات، من ده‌پرسم:

حاڵه‌تی سایكۆلۆژیا ئایا تیۆریزه‌ كراوه‌، له‌باره‌ی ئابوورییه‌وه‌ پاساوی بۆ هێنراوه‌ته‌وه‌، له‌باری ئایدۆلۆژییه‌وه‌ ئامرازی بۆ پێكهێنراوه‌‌و حزبی بۆ پێكهێنراوه‌، ستراتیژی بۆ دارێژاروه‌، وه‌ڵامی‌ ئه‌و هه‌موو پرسیاره‌ تا ئێستا نابینین، ئێمه‌ نایشارینه‌وه‌ راچڵه‌كین به‌و سه‌رئه‌نجامه‌، به‌ڵام نه‌سه‌ركه‌وتنی گه‌وره‌ له‌خۆبایمان ئه‌كات، نه‌ ئه‌نجامی ئاواش چۆكمان پێداده‌دات، راچڵه‌كین بۆ ئه‌وه‌ی له‌بنج‌و بناوانی كێشه‌كان تێكرا بكۆڵینه‌وه‌، سه‌رئه‌نجام به‌رنامه‌یه‌ك‌و پرۆژه‌یه‌ك‌و ستراتیژێكی تازه‌ پێكبهێنین بۆ رووبه‌رووبوونه‌وه‌ی ئه‌و حاڵه‌ته‌ی دووچارمان بوو، له‌راستیدا توانیوومانه‌ له‌پێَش پلنیۆم‌و دوای پلنیۆم‌و دواتریش هه‌ندێك هه‌نگاوی گرنگ بنێین‌و به‌ره‌وامین، ئه‌گه‌ر به‌ئاره‌زوو بوایه‌، له‌دوای هه‌فته‌یه‌ك له‌هه‌ڵبژاردنی په‌رله‌مانی كوردستان حه‌زمان ده‌كرد هه‌موو كێشه‌كانمان چاره‌سه‌ر بكه‌ین، ئه‌گه‌ر به‌مانگێكیش بێت گۆرانكاری ته‌واو به‌دی بهێنین، به‌ڵام بۆمان ده‌ركه‌وت ئه‌و نوشسته‌ بكه‌ینه‌ مایه‌ی گۆرانكاری، پێویستی به‌كات هه‌یه‌، پێویستی‌ به‌ به‌رنامه‌‌و كۆششی زۆر هه‌یه‌.

ده‌ستوور: ئه‌و رێگرییانه‌ چین كه‌ وا ده‌كات ئێوه‌ نه‌توانن ده‌ستكراوه‌ بن له‌راستكردنه‌وه‌ی هه‌ڵه‌و شكسته‌كه‌تان؟
مه‌لا به‌ختیار: رێگری زۆرن، یه‌كه‌م: كێشه‌ سیاسیه‌كانی ناوچه‌كه‌‌و عێراق، ململانێ‌و پیلانه‌كان، دووه‌م: پێشینه‌یه‌كی ده‌سه‌ڵاتدارێتی‌و بنه‌ما‌و كلتوورێكی ده‌سه‌ڵاتدارێتی كوردستانیمان نییه‌، تابتوانین چاك به‌خراپ به‌راورد بكه‌ین‌و زوو چاره‌سه‌ری بۆ بدۆزینه‌وه‌، ئه‌وه‌ی كه‌ هه‌یه‌ ئه‌وه‌یه‌ كه‌ له‌م چه‌ند ساڵه‌دا هه‌موومان لێی به‌رپرسیارین، ئه‌بێت ئه‌زموونێك به‌ئه‌زموونێكی دیكه‌ تێپه‌رێنین، ئه‌م تاقیكردنه‌وه‌یه‌ تازه‌یه‌ به‌نیسیه‌ت ئێمه‌وه‌.
مه‌سه‌له‌یه‌كی دیكه‌ كه‌ زۆر گرنگه‌، ئه‌وه‌یه‌ له‌ناو ئێمه‌دا به‌هه‌زاران ته‌كنۆكرات، به‌هه‌زاران پرۆفیسۆر‌و خه‌ڵكی به‌توانا‌و قاڵَبو‌و شاره‌زا، له‌داموده‌زگا نییه‌، وڵاتێك چه‌ندین ده‌زگای دیاریكراوی هه‌یه‌ ده‌یان كه‌سایه‌تی شاره‌زای هه‌یه‌‌و ئه‌و مامۆستا‌و پرۆفیسۆرانه‌ی كه‌ هه‌مانه‌ به‌شی زانكۆكانی خۆمان ناكات، بۆیه‌ له‌ئێستادا ناتوانیین به‌ئاره‌زوو بۆ گۆرانكاری بریار بده‌ین، به‌پیًَی تواناكانی ئێستامان ده‌توانین بریار بده‌ین بۆ گۆرانكاری، گۆرانكاری به‌شێكه‌ له‌مێژووی دیموكراسی، دیموكراسی ملكه‌چ نییه‌ بۆ گۆرانكاری، گۆرانكاری ملكه‌چه‌ بۆ پرۆسه‌ مێژوویه‌كه‌ی دیموكراسی، ناكرێت گۆرانكاری زاڵ بكه‌یت به‌سه‌ر پرۆسه‌ی دیموكراسی، پرۆسه‌ی‌ دیموكراسی پرۆسه‌یه‌كی مێژووییه‌، ئه‌م پرۆسه‌یه‌ك زه‌مان، هه‌لومه‌رج، زه‌مینه‌، قۆناغ، پاشكه‌وتن‌و سه‌ركه‌وتن، پێشكه‌وتن‌و شكست، دژ‌و پیلانگیری، په‌رۆش‌و تێكۆشه‌ری هه‌یه‌.

ده‌ستوور: هێنده‌ گۆرانكاڕیتان كردووه‌، له‌هه‌ڵبژاردنی په‌رله‌مانی عێراقدا، دۆخه‌كه‌ هاوسه‌نگ بكاته‌وه‌؟
مه‌لا به‌ختیار: ئه‌و سه‌رئێشانه‌ی له‌هه‌ڵبژاردنی په‌رله‌مانی كوردستان هه‌مانبوو به‌شێكیمان له‌كۆڵ كردووه‌ته‌وه‌، دڵنیاییه‌كی به‌رچاو له‌ناو ڕیزه‌كانی ئێمه‌‌و دۆسته‌كان‌و جه‌ماوه‌ری یه‌كێتی نیشتمانی كوردستان هاتوه‌ته‌دی، ده‌توانم بڵێم هاوكێشه‌كه‌ تاراده‌یه‌ك پێچه‌وانه‌ بوه‌ته‌وه‌، له‌شه‌ش مانگی رابردوودا خه‌ڵك بۆی ده‌ركه‌وت به‌دروشم‌و به‌رنامه‌ی پروپاگه‌نده‌‌و رۆژنامه‌كان ستراتیژی‌ گۆڕانكاری نایه‌ته‌دی، خه‌ڵك بۆی ده‌ركه‌وت گۆرانكاری به‌ڕاستی‌ كاتی ده‌وێت، زه‌مینه‌و هه‌ناسه‌ی ده‌وێت، ئێمه‌ ئێستا باشتر له‌جاران هه‌نگاو ده‌نێین، ئێمه‌ ناتوانم بلێین هه‌موو كێشه‌كانمان چاره‌سه‌ركردووه‌، بایی ئه‌وه‌ی پلینۆم به‌رپرسیارێتی خستووه‌ته‌ سه‌رشانمان، هه‌نگاوی باشترمان ناوه‌، به‌ڵام پلینۆم له‌به‌رئه‌وه‌ی ده‌سه‌ڵاته‌كه‌ی دیاریكراوه‌، باقی چاره‌سه‌ره‌كه‌ی به‌كۆنگره‌ سپێردراوه‌، كه‌ له‌ناوه‌راستی مانگی (5)ی ئه‌مساڵ ده‌به‌سترێت، ئه‌و كاته‌ بێگومان كێشه‌‌و گرفتی‌ زۆرترمان چاره‌سه‌ر ده‌كه‌ین.

ده‌ستوور: به‌شێك له‌و هه‌نگاوانه‌ی كه‌ نراوه‌ دروستكردنی ئه‌نجومه‌نی ناوه‌ند بوو، كه‌ شێوازی كاركردنیان زۆر روون نه‌بوو، ئه‌ندامانی‌ مه‌كته‌بی سیاسی یه‌كێتی جارێك ده‌یانووت، ئه‌مه‌ وه‌ك په‌رله‌مانێك وایه‌، جارێكی‌ تر ده‌یانوت وه‌ك ئه‌نجومه‌نێكی راوێژكارییه‌، پێتوابوو دروستبوونی ئه‌و ئه‌نجومه‌نه‌ شتێكی زه‌روری بێت؟

مه‌لا به‌ختیار: شتێكمان داهێنا، سه‌ركه‌وتنوو سه‌رنه‌كه‌وتنی په‌یوه‌سته‌ به‌ئه‌دای ئه‌نجومه‌نه‌كه‌، ئه‌زموونی تازه‌ ناتوانرێت فاڵی بۆ بگرینه‌وه‌، بزانین ئایه‌ سه‌رده‌كه‌وێت یاخود نا، بالێی گه‌ڕێین ئه‌و ئه‌زموونه‌ تاقی بكرێته‌وه‌‌و بچێته‌ ناو بواره‌كانی ژیانی حزبایه‌تی ئێمه‌وه‌، دوای كۆنگره‌ شه‌ن‌و كه‌وێكی ده‌كه‌ینه‌وه‌، لایه‌نی گه‌شی زۆربوو گه‌شتری ده‌كه‌ین، له‌م كۆنگره‌یه‌دا ناتوانین قسه‌ی له‌سه‌ر بكه‌ین، به‌ڵام له‌كۆنگره‌یه‌ی داهاتوودا ئه‌گه‌ر لایه‌نی كه‌مووكوری زۆرتربوو، ئه‌وا بڕیارێكی‌ تر ده‌ده‌ین.

ده‌ستوور: باسی ئه‌وه‌تكرد له‌ ئه‌نجومه‌نه‌كه‌ ده‌گه‌ڕێن ئیش بكات، به‌ڵام له‌دوای شكستی حزب له‌دوای (25-7) ئه‌و ئه‌نجومه‌نه‌ بۆ چاره‌سه‌ره‌كردنی كێشه‌كانی ناو یه‌كێتی‌و له‌چوارچێوه‌ی‌ هه‌نگاوه‌ به‌په‌له‌كاندا دروستكرا،ئه‌گه‌ر ئێوه‌ لێیبگه‌رێن بزانن ئه‌نجومه‌نه‌كه‌ چۆنه‌، چۆن ده‌توانێت به‌شێك له‌و باره‌ گلاوه‌ بگرێته‌ ئه‌ستۆ‌و چاكی بكاته‌وه‌؟
مه‌لا به‌ختیار: نه‌مانوتووه‌ لێی ئه‌گه‌رێین، ئه‌نجومه‌نه‌كه‌ به‌شێكه‌ له‌په‌یڕه‌وی ناوخۆی یه‌كێتی، ئه‌و ئه‌نجومه‌نه‌ راسته‌وخۆ په‌یوه‌ندی به‌ به‌ڕێز سكرتێری‌ گشتی‌‌و مه‌كته‌بی سیاسی یه‌كێتییه‌وه‌ هه‌یه‌، ئێمه‌ لێیناگه‌رێین، كارلێكێكی ته‌واو له‌نێوان سه‌ركردایه‌تی‌و ئه‌نجومه‌نه‌كه‌‌و مه‌كته‌بی سیاسی‌و له‌پێش هه‌مویاندا سكرتێری گشتی هه‌یه‌، هه‌وڵده‌ده‌ین به‌پێی ده‌سه‌ڵاته‌كانی‌ په‌یڕه‌وی‌ ناوخۆ ئه‌ركه‌كانی جێبه‌جێ بكات‌و سه‌ركه‌وتن به‌ده‌ست بهێنێت.

ده‌ستوور: ئه‌ندامانی مه‌كته‌بی سیاسیی‌و سه‌ركرایه‌تی ئاماده‌ن له‌لایه‌ن ئه‌و ئه‌نجومه‌نه‌وه‌ لێیان بپرسێته‌وه‌؟

مه‌لا به‌ختیار: په‌یره‌وی ناوخۆ هه‌رچی وتبێت، هه‌موو كه‌سێك ده‌بێت ملكه‌چی بێت به‌بێ جیاوازی.

ده‌ستوور: له‌و بڕوایه‌دایت ئه‌ندامانی ئه‌نجومه‌ن بتوانن ئه‌ندامانی مه‌كته‌بی سیاسی‌و به‌رپرسی مه‌كته‌به‌كان ببنه‌ به‌رده‌م ئه‌نجومه‌نه‌كه‌‌و لێپرسینه‌وه‌ی له‌گه‌ڵدا بكه‌ن؟
مه‌لا به‌ختیار: به‌ئاسانی.

ده‌ستوور: قسه‌یه‌كی‌ زۆر له‌دانان‌و ده‌ستنیشانكردنی‌ ئه‌ندامه‌كان ده‌كرێت، ده‌وترێت ئه‌مه‌ بۆیه‌ دانراوه‌ (80) بنه‌ماڵه‌ له‌ده‌روی یه‌كێتی زیز بوون، به‌هۆیه‌وه‌ ئاشتیان ده‌كه‌نه‌وه‌، ده‌وترێت كوتله‌كانی‌ یه‌كێتی‌ و مه‌كته‌ب سیاسییه‌كان پشكیان هه‌بووه‌ له‌ ئه‌نجومه‌نه‌كه‌؟
مه‌لا به‌ختیار: ئه‌گه‌ر له‌من ده‌پرسیت خۆم كارگێری مه‌كته‌بی سیاسیم‌و هیچ پشكێكم نه‌بوو، قسه‌شمان له‌سه‌ر هه‌موو كاندیده‌كان كردووه‌، پێموایه‌ ئه‌وه‌ی پێش پلینۆم قسه‌ ده‌كرا له‌سه‌ر هه‌ڵبژاردنی خه‌ڵك ئێستا تاڕاده‌یه‌ك بنه‌مایان نه‌ماوه‌، بۆ نمونه‌ گرنگترین شت هه‌ڵبژاردنی په‌رله‌مانی عێراقه‌، به‌دوو فلته‌ری هه‌ڵبژاردنی مه‌ڵبه‌نده‌كان‌و فلته‌ری راپرسی رێكخراوه‌كانی كۆمه‌ڵی مه‌ده‌نی تێپه‌ڕیووه‌، ده‌توانم بڵێم زیاتر (90%) كاندیده‌كانی یه‌كێتی به‌و دوو فلته‌ره‌دا تێپه‌ڕیون، دواتر به‌مه‌كته‌بی سیاسی‌و سه‌ركردایه‌تیدا تێپه‌ریوون، ئه‌ندامانی ئه‌نجومه‌ن له‌ئێستادا نه‌ده‌كرا به‌هه‌ڵبژاردن بیكه‌ین، چونكه‌ په‌یره‌وی ناوخۆ وا نالێت، به‌ڵام دڵنیام كۆنگره‌ ئالییه‌تێك بۆ هه‌ڵبژاردنی ئه‌ندامانی ئه‌نجومه‌ن داده‌نێت، برواناكه‌م حزب هه‌بێت له‌سه‌ر دیاریكردنی كاندید بۆ پۆسته‌ گه‌وره‌كان بیروارای جیاوازی تیانه‌بێت، له‌روانگه‌ی ده‌زگاكان‌و ئه‌ندامانی مه‌كته‌بی سیاسی حزبه‌كانه‌وه‌ هه‌وڵنه‌درێت شیاوترین كه‌س دیاری‌ بكرێ، زۆرتر هه‌وڵ بۆ ئه‌و كه‌سه‌ش نه‌درێت، ئه‌مه‌ش شتێكی ئاساییه‌ له‌حزبدا.

ده‌ستوور: تۆ دڵنیایت كه‌ هیچ ته‌كه‌تول‌و هیچ باڵێك له‌سه‌ر دانانی كه‌سه‌كانه‌وه‌ نه‌بووه‌؟
مه‌لا به‌ختیار: ناتوانم بڵێم ئاسه‌واری ته‌كه‌توول نه‌ماوه‌، به‌ڵام ئه‌توانم بڵێم له‌دوای پلینۆمه‌وه‌، ئه‌و پێوه‌رانه‌ی پێشتر كاری تیاده‌كرا به‌شێكی به‌رچاوی‌ له‌چه‌ند مانگی رابردوو كاریان پێنه‌كراوه‌.

ده‌ستوور: یه‌كێكی تر له‌و هه‌نگاوانه‌ی كه‌ بۆ ڕێكخستنه‌وه‌ ناوتانه‌، گۆڕینی‌ شێوازی‌ كاركردنی‌ راگه‌یاندنی‌ یه‌كێتییه‌، به‌تایبه‌تی له‌كوردستانی نوێ ئایا یه‌كێتی پێی وایه‌ ئه‌و شكسته‌ی پێشتر تووشی بووه‌ له‌هه‌ڵای راگه‌یاندنه‌كانی كۆمپانیای وشه‌ بوون‌و ئێستا ده‌تانه‌وێت ئێوه‌ش له‌ڕێگه‌ی‌ راگه‌یاندنه‌وه‌ دۆخه‌كه‌ هاوسه‌نگ بكه‌نه‌وه‌؟

مه‌لا به‌ختیار: هه‌ڵوێست وه‌رگرتن به‌رامبه‌ر به‌گۆڕان‌و كۆمپانیای وشه‌ له‌مه‌كته‌بی سیاسییه‌وه‌ بۆچوونی جیاوازی تیابوو، به‌ڵام له‌جه‌نابی مام جه‌لاله‌وه‌ تا زۆربه‌ی‌ مه‌كته‌بی سیاسی ده‌یانزانی كه‌ كۆمپانیای وشه‌ چ زیانێك به‌یه‌كێتی‌و ئه‌زموونه‌كه‌ ده‌گه‌یه‌نێت، به‌ڵام ئه‌وپه‌ڕی دانیان به‌خۆیاندا گرت بۆ ئه‌وه‌ی بتوانن به‌ئاراسته‌یه‌كی ترو به‌ئارامتر ئه‌و كێشه‌یه‌ چاره‌سه‌ر بكه‌ن، ئێمه‌ له‌مه‌كته‌بی سیاسی كه‌ دانیشتووین هیچ ئه‌ندامێكی مه‌كته‌بی سیاسی هه‌ست ناكه‌م به‌هه‌ڵه‌ چووبن به‌رامبه‌ر گۆڕان، به‌ڵكو هه‌ندێك له‌ئه‌ندامانی مه‌كته‌بی سیاسی له‌ناو مه‌كته‌بی سیاسی كه‌ قسه‌یان كردووه‌، له‌رۆژنامه‌نووسه‌كان رۆشنتر هه‌ڵسه‌نگاندنیان بۆ گۆڕان هه‌بوو، به‌ڵام ئه‌زموونی كێشه‌كانی مێژووی كورد پاڵنه‌ر بوون به‌رامبه‌ر كێشه‌یه‌كی دیكه‌ی ناو یه‌كێتی به‌شێكمان به‌و ئارامییه‌ ره‌فتار بكه‌ن، به‌ڵام له‌دوا سه‌رئه‌نجامدا ده‌ركه‌وت سیاسه‌تی خۆپارێزی راگه‌یاندنی یه‌كێتی ناتوانێت ده‌سته‌به‌ری جیانه‌كردنه‌وه‌ی گۆڕان بێت له‌یه‌كێتی نیشیتمانی كوردستان، سه‌رئه‌نجام هه‌رجیابوونه‌وه‌‌و سووریش بوون له‌سه‌ری، ده‌شتوانم بڵێم: سوودیان له‌و نه‌رمییه‌ی مام جه‌لال‌و ئه‌ندامانی مه‌كته‌بی سیاسی‌و خۆپارێزییه‌ی‌ به‌شێكی‌ ڕاگه‌یاندنی‌ یه‌كێتیش بینی.

ده‌ستوور: ئێستا ده‌وترێت چۆن ڕێكخستنه‌كان مه‌كته‌بی‌ سیاسییان به‌هه‌ڵه‌دا برد، ئه‌مجاره‌ راگه‌یاندنی‌ یه‌كێتی‌ خه‌ریكه‌ هه‌مان هه‌ڵه‌ ده‌كاته‌وه‌، بۆ نمونه‌ له‌باره‌ی گه‌ڕاوه‌كانه‌وه‌، ده‌وترێت ئه‌وانه‌ی كوردستانی نوێ ده‌ڵێت گه‌ڕاونه‌ته‌وه‌ كۆیان بكه‌یته‌وه‌، له‌و (25) كورسیه‌ی گۆران زیاتره‌؟
مه‌لا به‌ختیار: بۆم باس كردیت له‌پێش پلینۆم‌و دوای پلینۆمیش یه‌كێتی‌ بڕیاریدا بۆ ماوه‌یه‌ك راستییه‌كان رۆشنتر بكاته‌وه‌، راگه‌یاندنی ئێمه‌ كه‌وته‌ خۆی زۆر شتی رۆشنكرده‌وه‌، به‌داخه‌وه‌ پیًَشتر نه‌رمی راگه‌یاندنی یه‌كێتی به‌وه‌لێكده‌درایه‌وه‌ كه‌ یه‌كێتی‌ نایه‌وێَت دابه‌زێته‌ ئه‌و ململانێیه‌، له‌به‌رئه‌وه‌ی به‌حساب به‌ڵگه‌نامه‌یه‌كی زۆرمان به‌ده‌ست لایه‌نی به‌رامبه‌ره‌وه‌ هه‌یه‌، یاخود هۆیه‌كی دیكه‌ی‌ به‌دواوه‌ بێت، به‌ڵام ده‌ركه‌وت كه‌ یه‌كێتی قسه‌ی هه‌یه‌‌و زانیاری هه‌یه‌‌و ئه‌توانێت زۆر فراوانتر له‌وه‌ی كه‌ بیری لێده‌كرێته‌وه‌ هه‌ڵمه‌تی راگه‌یاندن بۆ به‌رگری له‌حزبه‌كه‌ی ده‌ست پیًَبكات.
سه‌باره‌ت به‌هاتنی ئه‌وانه‌ی ده‌نگیشیان به‌گۆڕان داوه‌، بێگومان پێشوازیه‌كی گه‌رم له‌هه‌موو ئه‌و هه‌ڤاڵانه‌ ده‌كه‌ین كه‌ دێنه‌وه‌ ریزی یه‌كێتی، خه‌ڵكێكی زۆر باشیش هاتوونه‌ته‌وه‌، به‌ڵام له‌ئاستی ئه‌و رێژه‌یه‌دا نییه‌ كه‌ تۆ ده‌یڵێیت، گۆڕان زیاتر له‌ 400 هه‌زار ده‌نگی‌ هێناوه‌، تا ئێستا پێشوازیمان له‌ (10) هه‌زار‌و (20) هه‌زار كه‌س كردووه‌، نازانم ئه‌و به‌راورده‌ چۆن كراوه‌، جگه‌ له‌وه‌ش بیرتان نه‌چێت ڕێژه‌یه‌كی زۆركه‌می یه‌كێتی چوونه‌ته‌ ناو گۆرانه‌وه‌، ئه‌و ده‌نگانه‌ی كه‌ گۆڕان هێناویه‌تی ته‌نها ده‌نگی یه‌كێتی نییه‌، ئه‌گه‌ر گۆران ته‌نها ده‌نگی كادیر‌و ئه‌ندامانی یه‌كێتی ببردایه‌، ره‌نگه‌ دوو كورسیشی نه‌بردایه‌ له‌په‌رله‌مانی كوردستان، ده‌نگی‌ خه‌ڵكی‌ بێلایه‌نیان بردووه‌، ده‌بێـت ئه‌وه‌ش بیرنه‌چێت له‌ پێنج ساڵی رابردوودا چه‌ند هه‌زار كه‌سێك مافی ده‌نگدانیان هه‌بووه‌‌و شموولی ده‌نگدانیان كردووه‌، دووه‌میش هه‌میشه‌ له‌هه‌موو هه‌ڵبژاردنه‌كانیشدا (30% بۆ 40%) خه‌ڵك ده‌نگ نادات، ئاڵوگۆڕ له‌ده‌نگده‌ردا له‌ناو هه‌موو هه‌ڵبژاردنه‌كاندا به‌رده‌وامه‌.

ده‌ستوور: به‌قسه‌كانتدا ده‌رده‌كه‌وێت به‌شێكی زۆری ئه‌وانه‌ی ده‌نگیان به‌گۆران داوه‌ گه‌نجن، پێتوایه‌ رێكخراوه‌كان‌و رێكخستنه‌كانی یه‌كێتی نه‌یانتوانیوه‌ نوێنه‌رایه‌تی‌ گه‌نجان بكه‌ن؟
مه‌لا به‌ختیار: ده‌توانم بڵێم ئه‌و ئاڵۆزییه‌‌و ئه‌و بیروبۆچوون به‌هه‌ڵه‌ چوونه‌، هه‌موو چین‌و توێژه‌كانی كۆمه‌ڵی گرتووه‌ته‌وه‌، ناتوانین بڵێن ته‌نها لاوی‌ گرتووه‌ته‌وه‌.

ده‌ستوور: پێتوایه‌ خه‌ڵك به‌هه‌ڵه‌دا چووه‌؟
مه‌لا به‌ختیار: به‌ش به‌حاڵی خۆم پێموایه‌ به‌شێكی ئه‌و خه‌ڵكانه‌ی ده‌نگیان به‌گۆران داوه‌، به‌هه‌ڵه‌ له‌ كێشه‌‌و پڕوپاگه‌نده‌كان تێگه‌یشتون. یان هیچ تاقیكردنه‌وه‌یه‌كیان له‌گه‌ڵ جه‌مسه‌ر‌و كه‌سایه‌تیه‌كاندا نه‌بوه‌‌و له‌دوره‌وه‌ هه‌واڵ‌و پڕوپاگه‌نده‌یان بیستووه‌، یان هه‌ندێك زانیاریان هه‌بوه‌، یان چه‌واشه‌كراون، یان مه‌غدور بوون.

ده‌ستوور: یه‌كێتی‌ تر له‌و هه‌نگاوانه‌ی‌ ناتان، بڵاوكردنه‌وه‌ی راپۆرتی سكرتێری گشتی بوو له‌پلنیۆمدا، قسه‌یه‌كی زۆر له‌سه‌ر بۆچوونی ئه‌ندامانی مه‌كته‌بی سیاسی چ به‌رامبه‌ر بڵاوكردنه‌وه‌ی راپۆرته‌كه‌ و مامه‌ڵه‌كردن له‌گه‌ڵ بزووتنه‌وه‌ی گۆراندا كۆك نین، ده‌ڵێن به‌رێزت‌و كاك ئه‌رسه‌لان له‌و گروپه‌ن كه‌ زۆر توندن له‌گه‌ڵ كۆمپانیای وشه‌‌و لیستی گۆڕان؟
مه‌لا به‌ختیار: یه‌كه‌م: تۆ ئه‌گه‌ر بگه‌رێیته‌وه‌ بۆ حه‌وت وتاره‌كه‌ی كاك نه‌وشیروان ره‌گ‌و ریشه‌ی ناكۆكییه‌كانی خۆی له‌ناو یه‌كێتی باس ده‌كات، هه‌مووی ده‌گێرێته‌وه‌ بۆ سه‌رده‌می شاخ‌و یه‌كه‌مین كۆنگره‌، كه‌ قۆناغێك له‌و قۆناغانه‌ من هه‌ر له‌یه‌كێتی نه‌بووم، به‌پێی ئاگاداری من كاك ئه‌رسه‌لانیش له‌مه‌كته‌بی سیاسی نه‌بووه‌، كاك ئه‌رسه‌لان له‌دوای كۆنگره‌ی یه‌كه‌مه‌وه‌ هاتۆته‌ سه‌ركردایه‌تی یه‌كێتی، ئه‌مه‌ وتاره‌كانی كاك نه‌وشیروان واده‌ڵێت، من وانالێم، دووه‌م: وه‌كو خۆت وتت، له‌به‌رامبه‌ر كێشه‌یه‌كی‌ ئاوا جیاوازدا زۆر ئاساییه‌ بیرورای جیاواز هه‌بێت، نا ئاساییه‌ بیروورای جیاواز نه‌بێت، خۆ ئێمه‌ تیپی مۆسیقا نین به‌پێی نۆته‌ هه‌لوێست ده‌ربڕین، نۆته‌كاننمان بۆ نه‌نوسراوه‌، ئه‌مه‌ كێشه‌یه‌كی قوڵه‌‌و سه‌ری هه‌ڵداوه‌‌و هه‌ریه‌كه‌كێك له‌ئێمه‌ پێشبینی‌و بیر‌وبۆچوونی جیاوازمان هه‌بووه‌، سه‌رئه‌نجام داوای هه‌ڵوێستمان كردووه‌، پێشتر پێم وتی له‌ناو مه‌كته‌بی سیاسیدا هیچ كه‌سێك نه‌بووه‌ وه‌كو ئێمه‌‌و توندتر له‌ئێمه‌، مه‌ترسییه‌كانی ئه‌م ناكۆكیانه‌ی نه‌زانیبێت، كه‌ كۆمپانیای وشه‌ دروستی ده‌كات، به‌ڵام پێم وتی چۆنیان ده‌ربریوه‌ جیاوازییه‌كه‌ له‌چۆنێتی ده‌ربرینه‌كه‌یدایه‌ نه‌ك له‌ مه‌بده‌ئی ده‌ربرینه‌كه‌دا.

ده‌ستوور: جیاوازییه‌كانی ئه‌ندامانی مه‌كته‌بی سیاسی له‌سه‌ر مامه‌ڵه‌كردن له‌گه‌ڵ یه‌كێتی‌و نه‌وشیروان مسته‌فادا بۆچی ده‌گه‌رێته‌وه‌؟
مه‌لا به‌ختیار: له‌به‌رئه‌وه‌ی كێشه‌كه‌ خۆی قوڵه‌ تا جیاده‌بێته‌وه‌ جیاوازی ڕه‌ها هه‌ڵده‌گرێت، منم ئه‌توانم بڵێم ڕه‌گ‌و ڕیشه‌ی كێشه‌ی نێوان جه‌نانی مام جه‌لال‌و كاك نه‌وشیروان ده‌گه‌ڕێته‌وه‌ بۆ دامه‌زراندنی كۆمه‌ڵه‌ له‌ساڵی (1970) له‌دامه‌زراندنی یه‌كێتییش بیروبۆچوونی جیاوازیان هه‌بووه‌، كه‌ هاتوونه‌ته‌وه‌ بۆ شاخ بیرو بۆچوونی جیاوازیان هه‌بووه‌، جه‌نابی مام جه‌لال خۆی ده‌ڵێت كه‌ له‌ساڵی (1984)وه‌ تێگه‌یشتووم كه‌ من‌و كاك نه‌وشیروان به‌دوو هێڵی لاته‌ریبدا ده‌رۆین.

ده‌ستوور: باسی مێژووتكرد، كاك نه‌وشیروان له‌یاداشته‌كان‌و كتێبه‌كانیدا باس له‌وه‌ده‌كات كاتێك شه‌هید ئارام شه‌هید ده‌بێت، پاڵێوراوه‌ سه‌ره‌كییه‌كان بۆ سكرتێری كۆمه‌ڵه‌ به‌رێزت‌و كاك سالار عه‌زیز بوون، ئه‌ڵێ مام جه‌لال منی كرد به‌سكرتێر وه‌ دان به‌وه‌شدا ده‌نێت كه‌ رۆژێك له‌رۆژان ماركسی‌ نه‌بووه‌، بۆچی‌ تاڵه‌بانی‌ به‌وشێوه‌ پشتگیری‌ نه‌وشیروان مسته‌فای‌ كرد؟
مه‌لا به‌ختیار: هه‌موو شتێك ده‌بێت بیگێڕیته‌وه‌ بۆ زه‌مان‌و زه‌مینه‌ی خۆی، واتا ئێستا به‌دابڕاوی بڕیار له‌سه‌ر ئه‌و زه‌مانه‌ بده‌یت هه‌ڵه‌یه‌، ئه‌گه‌ر ئێستاش له‌و زه‌مانه‌ بچه‌قێنیت هه‌ڵه‌یه‌، هه‌موو شتێك ده‌بێت بگێریته‌وه‌ بۆ زه‌مان‌و زه‌مینه‌ی خۆی، بێگومان مام جه‌لال له‌دامه‌زراندنی یه‌كێتی نیشتمانی كوردستانه‌وه‌ به‌ده‌یان به‌رامبه‌ر زیاتر له‌هه‌موو ئه‌ندامانی سه‌ركردایه‌تی‌و مه‌كته‌بی سیاسی به‌باڵه‌كه‌ی بزووتنه‌وه‌‌و كۆمه‌ڵه‌شه‌وه‌، پشتیوانی كاك نه‌وشیروانیان ده‌كرد.

ده‌ستوور: بۆچی‌؟
مه‌لابه‌ختیار: له‌پای ئه‌وه‌ی یه‌كێتی هێزێك بووه‌ تازه‌ پێكهاتووه‌، پێویستی به‌قابیلییه‌ت، نوسه‌ر، ئه‌قڵ، ئه‌زموون دیده‌ هه‌بووه‌، كاك نه‌وشیروان یه‌كێك بووه‌ له‌و كه‌سانه‌‌و هاورێی مام جه‌لال بووه‌، سه‌باره‌ت به‌وه‌ی كه‌ پرسیت، دوای شه‌هید بوونی كاك ئارام، من تاكه‌ ئه‌ندامی سه‌ركردایه‌تی یه‌كێتی بووم كه‌ چووم بۆ لێكۆڵینه‌وه‌ له‌شه‌هید بوونی كاكه‌ ئارام، ئه‌و كاته‌ شه‌هید ئازاد هه‌ورامی به‌هۆی كاره‌ساتی هه‌كارییه‌وه‌ گیرابوو، كاك سالاریش له‌ده‌ره‌وه‌ی وڵات بوو، كاك ئارامیش شه‌هید بوو، تاقه‌ ئه‌ندامی كۆمیته‌ی هه‌رێمه‌كان مابوویه‌وه‌ من بووم له‌ناو وڵاتدا، له‌راستیدا یه‌كه‌مین كه‌س كه‌ نامه‌ی بۆ جه‌نابی مام جه‌لال نوسیوه‌ بۆ ئه‌وه‌ی‌ كۆبوونه‌وه‌یه‌كی فراوانی كۆمه‌ڵه‌ بكرێت‌و كاك نه‌وشیروان بكرێته‌ سكرتێری كۆمه‌ڵه‌ من بووم، ئه‌مه‌ باش بووبێ یاخراپ، به‌قسه‌م كرابێت یان نه‌كرابێت، به‌هۆی نامه‌كه‌ی منه‌وه‌ كرابێت به‌سكرتێری كۆمه‌ڵه‌، یا به‌هۆی پشتیوانییه‌كه‌ی مام جه‌لاله‌وه‌ كرابێت به‌سكرتێر، ده‌بێت ئه‌و راستییه‌ بڵێم، له‌ كۆبونه‌وه‌ فراوانه‌كه‌ی‌ كادرانی‌ كۆمه‌ڵه‌ش (1978) له‌ نۆكان، كاك نه‌وشیروان ته‌نها یه‌ك ده‌نگ زیاتری‌ له‌ من هێناوه‌.

ده‌ستوور: بۆچی‌ داواتكرد نه‌وشیروان مسته‌فا ببێته‌ سكرتێری‌ كۆمه‌ڵه‌؟
مه‌لا به‌ختیار: له‌به‌رئه‌وه‌ش وتم با كاك نه‌وشیروان بێت، چونكه‌ ئه‌وكاته‌ به‌من نه‌ده‌كرا، له‌هه‌مان كاتدا له‌ناو شار باشترین ئۆرگانه‌كانی كۆمه‌ڵه‌ پشتیوانی منیان ده‌كرد كه‌ ببمه‌ سكرتێری كۆمه‌ڵه‌، به‌ڵام به‌راستی به‌من نه‌ده‌كرا، ئه‌وكاته‌ من ته‌مه‌نم كه‌م بوو، ئه‌زموونم كه‌م بوو، قه‌ڵه‌مم لاوازبوو، توانای سیاسیشم ئه‌وكاته‌ كه‌مبوو، له‌به‌رئه‌وه‌ی كه‌سی تریش شك نه‌ده‌برا بۆیه‌ كاك نه‌وشیروانمان هه‌ڵده‌بژارد بۆ سكرتێری كۆمه‌ڵه‌، هاوڕێیانی‌ دیكه‌ له‌ساڵی (1978) له‌زیندان بوون ئازاد نه‌كرابوون، ته‌نها ئه‌وانه‌ مابووینه‌وه‌ كه‌ هه‌بووین، خۆ ناشكرێت بچین سكرتێر قه‌رز بكه‌ین، خۆ ده‌بێت له‌و هه‌ڤاڵانه‌ بێت كه‌ له‌ناوماندا مابوونه‌وه‌.

ده‌ستوور: بچینه‌وه‌ سه‌ر بابه‌تی راپۆرتی سكرتێری گشتی‌ یه‌كێتی نیشتمانی، تۆ له‌گه‌ڵ ئه‌وه‌دا بوویت له‌راگه‌یاندنه‌كاندا بڵاوبكرێته‌وه‌؟
مه‌لا به‌ختیار: به‌م شێوه‌یه‌ی ئێستا به‌ڵی.

ده‌ستوور: كاك د. به‌رهه‌م ئه‌ڵێت له‌گه‌ڵیدا نیم، كاك عیمادیش ئه‌ڵێت ده‌ستكاری كراوه‌‌و ئه‌وه‌ ده‌قی راپۆرته‌كه‌ نییه‌؟
مه‌لا به‌ختیار: من نامه‌وێت له‌سه‌ر ئه‌و مه‌سه‌له‌یه‌ بڕۆم تاوه‌كو جه‌نانی مام جه‌لال خۆی روونكردنه‌وه‌ نه‌دات، چونكه‌ ئه‌و راپۆرته‌ راپۆرتی جه‌نابی مام جه‌لاله‌، ئه‌مه‌ جگه‌ له‌وه‌ی‌ هه‌ر هه‌ڤاڵێكی‌ تر قسه‌ی‌ جیاوازی‌ له‌سه‌ر راپۆرته‌كه‌ هه‌یه‌، هه‌ق وایه‌ له‌ناو مه‌كته‌بی سیاسی باسی بكه‌ینه‌وه‌ نه‌ك له‌سه‌ر رۆژنامه‌.

ده‌ستوور: قسه‌یه‌ك هه‌یه‌‌و گومان ده‌كرێت كه‌ تۆ به‌شێك ده‌ستكاری راپۆرته‌كه‌ت كردبێت؟مه‌لا به‌ختیار: ئه‌گه‌ر نه‌رمترم نه‌كردبێت، ره‌قترم نه‌كردووه‌، ده‌قه‌ ئه‌سلییه‌كه‌و ده‌قه‌ نه‌رمكراوه‌كه‌شم لایه‌.

ده‌ستوور: ئه‌وترێت جۆرێك له‌ بێ ته‌نسیقی له‌نێوان ئه‌ندامانی مه‌كته‌بی سیاسیدا هه‌یه‌، بۆ نمونه‌ كاك عیماد ئه‌ڵێت ده‌ستكاری كراوه‌، كاك به‌رهه‌م ئه‌ڵێت له‌گه‌ڵیدا نیم، تۆ به‌شێوه‌یه‌كی دیكه‌؟
مه‌لا به‌ختیار: وه‌ڵامه‌كه‌م دایه‌وه‌.

ده‌ستوور: بابه‌تێكی‌ دیكه‌ كه‌ زۆر قسه‌ی‌ هه‌ڵده‌گرێت مه‌سه‌له‌ی په‌یوه‌ندی یه‌كێتی‌و بزوتنه‌وه‌ی گۆڕانه‌، پێشتر ده‌وترا بزوتنه‌وه‌ی گۆران یان لیستی گۆران‌و كۆمپانیای وشه‌ به‌شێكن له‌یه‌كێـتی، هه‌تا پارتیش به‌شێك له‌و گومانه‌ی هه‌بوو، خه‌ڵك به‌جۆرێك له‌جۆره‌كان دڵنیا نه‌بوو ئایه‌ ئه‌مه‌ یارییه‌كی نێوان مام جه‌لال‌و كاك نه‌وشیروانه‌، ته‌فسیری زۆری بۆ كرا، به‌ڵام سه‌رئه‌نجام كاك نه‌وشیروان له‌راگه‌یاندنه‌كاندا وتی چیتر ئێمه‌ یه‌كێتی نین‌و یه‌كێتیمان جێهێشتووه‌ بۆ خاوه‌نه‌كانی‌. بۆچی ئێستا یه‌كێتی وه‌ك ته‌یارێكی سیاسی له‌ده‌ره‌وه‌ی خۆی حساب بۆ ناكات ؟
مه‌لا به‌ختیار: ئێمه‌ سكرتێر، سه‌ركردایه‌تی، مه‌كته‌بی سیاسی، ئۆرگان، په‌یره‌و پرۆگراممان هه‌یه‌، مه‌ڵبه‌ند‌و مه‌كته‌به‌كان‌و ئه‌نجومه‌نمان دروستكردووه‌، مه‌رجه‌عییه‌تی ئێمه‌ داموده‌زگای ڕه‌سمییه‌، سكرتێری گشتیش ده‌سه‌ڵاته‌كه‌ی سنوورداره‌ له‌ناو په‌یره‌وی ناوخۆی یه‌كێتی نیشتمانی كوردستاندا، به‌ڵام ئه‌وان مه‌رجه‌عیان فه‌رده‌و داموده‌زگای‌ ڕه‌سمیان نییه‌، له‌گه‌ڵ ئه‌وه‌شدا له‌م باره‌شه‌وه‌، ڕه‌چاوی‌ ئه‌ركه‌ یاساییه‌كانمان كردووه‌، به‌پێی یاسا‌و له‌حكومه‌ت‌و سه‌رۆكایه‌تی هه‌رێم‌و له‌په‌رله‌مانی كوردستان مامه‌ڵه‌یه‌كی‌ ئوسوڵیمان له‌گه‌ڵدا كردوون، به‌یه‌كه‌وه‌ له‌په‌رله‌مانداین، له‌كۆبوونه‌وه‌كانی سه‌رۆكی هه‌رێمدا ئه‌وان ئاماده‌بوون‌و ئێمه‌ش ئاماده‌ین، قه‌ت نه‌مان وتووه‌ ئه‌گه‌ر ئه‌وان ئاماده‌بن ئێمه‌ ئاماده‌ نابین، كاك به‌رهه‌م له‌كاتی پێكهێنانی حكومه‌ته‌كه‌یدا له‌گه‌ڵ هه‌موو حزبه‌كاندا دانیشتووه‌ به‌كاك نه‌وشیروانیشه‌وه‌، به‌ڵام له‌رووی حزبیه‌وه‌ ئێمه‌له‌گه‌ڵیان دانانیشین، ئه‌وان خۆ حزب نین تا له‌گه‌ڵیان دابنینشین، ئۆرگانیان نییه‌، ده‌زگایان پێكنه‌هێناوه‌، رێكه‌وتن له‌گه‌ڵ كێ بكه‌ین، خۆیان ئه‌ڵێن كۆمپانیای وشه‌ په‌یوه‌ندی به‌گۆرانه‌وه‌ نییه‌، ئێ گۆرانیش حزب نییه‌، ئێمه‌ چی بكه‌ین له‌و ناوه‌نده‌دا، هه‌ركاتێك بوون به‌حزب‌و هه‌ڵبژاردن بكه‌ن‌و له‌هه‌ڵبژاردنه‌كه‌شدا به‌پێی یاسا دادوه‌ر بڕوات بۆ هه‌ڵبژاردنه‌كه‌‌و مۆڵه‌تی حزبی وه‌ربگرن، ئه‌وكاته‌ ئێمه‌ش دیدی خۆمان رۆشن ده‌كه‌ینه‌وه‌.

ده‌ستوور: ده‌وترێت هه‌ر له‌سه‌ره‌تاوه‌ كاك نه‌وشیروان نییه‌تی ئه‌وه‌ی هه‌بووه‌ له‌یه‌كێتی بێته‌ ده‌ره‌وه‌، حزبێكی سیاسی دروستبكات، به‌ڵام مانه‌وه‌و به‌هه‌ڵواسراوی هێشتنه‌وه‌ی مه‌سه‌له‌كه‌، بۆ ئه‌وه‌ بوو دۆخی یه‌كێتی به‌شڵۆقی بهێڵێته‌وه‌، به‌رده‌وام یه‌كێتی له‌قه‌یراندا بێت، ده‌ڵێن ئێستا یه‌كێتیش ده‌زانێت ئه‌وان سودیان له‌و دۆخه‌ وه‌رگرتووه‌، ئێوه‌ش ده‌تانه‌وێت ئه‌وه‌ی‌ له‌ ئه‌نجامی‌ قه‌یرانه‌كه‌ی كه‌ له‌یه‌كێتی ده‌ستیان كه‌وتووه‌ لێیان وه‌ربگرێته‌وه‌؟
مه‌لا به‌ختیار: منیش پێموایه‌ به‌شی‌ یه‌كه‌می‌ پرسیاره‌كه‌ت وابووه‌و ئه‌وان وایانكرد، به‌شی دووه‌می پرسیاره‌كه‌ت پێشتر وه‌ڵامم دایته‌وه‌.

كاك به‌ختیار: به‌ره‌و هه‌ڵبژاردنی په‌رله‌مانی عێراق ده‌رۆین‌و به‌شێوه‌ی لیستی نیمچه‌ كراوه‌ ده‌بێت، به‌پێی هه‌ندێك لێكدانه‌وه‌ی رۆژنامه‌‌و گۆڤاره‌كان ده‌ڵێن گۆران له‌یه‌كێتی زیاتر ده‌هێنێت، ئێوه‌ به‌و پێشبینیه‌ی كه‌ كردووتانه‌ به‌نیازی چه‌ند كورسین؟
مه‌لا به‌ختیار: به‌ش به‌حاڵی خۆم من ناتوانم هیچ بڵێم، له‌راستیدا له‌به‌رئه‌وه‌ی ده‌زگایه‌كی زانستی ڕاپرسی له‌كوردستاندا نییه‌‌و ئه‌وه‌ی هه‌یه‌ وه‌كو ئه‌وانه‌ی ئه‌وروپا نییه‌، ناتوانین پشت به‌و ڕاپرسییه‌ ببه‌ستین، ئه‌گه‌رنا ده‌زگای راپرسی بیانی‌ ڕاپرسی كردووه‌‌و ئێمه‌ وه‌زعمان باشتره‌، به‌ڵام نه‌ئه‌مه‌‌و نه‌ئه‌وه‌، ناتوانین هیچ جۆره‌ قه‌زاوه‌تێكی تێدا بكه‌ین، هه‌ڵیده‌گرین بۆ ئه‌وه‌ی بزانین ئه‌دای حكومه‌تمان، خۆمان، هێزه‌كانی هاوپه‌یمانمان، هه‌موومان ئه‌و به‌رنامه‌یه‌ی هه‌مانه‌ چۆن جێیبه‌جێی ده‌كه‌ین، له‌دوا ئه‌نجامدا كۆمه‌ڵانی خه‌ڵكی كوردستان متمانه‌ به‌ لیستی كێ ده‌دات، به‌ئه‌دا‌و به‌ سیاسه‌ت‌و دروشم‌و مسداقییه‌تی كێ باوه‌ر ده‌كات؟ بۆیه‌ ناتوانم هیچ جۆره‌ فاڵێك بگرمه‌وه‌، به‌ڵام به‌ش به‌حاڵی خۆم دۆخی‌ هاوپه‌یمانی كوردستان به‌چاك ئه‌بینم، دۆخی‌ یه‌كێتیش له‌هه‌ڵبژاردنی په‌رله‌مانی كوردستان به‌چاكتر ده‌بینم.

ده‌ستوور: له‌پارێزگای سلێمانیدا گۆڕان ده‌نگی‌ له‌ یه‌كێتی‌ زیاتر هێنا كه‌ پارتیش هاوپه‌یمانی‌ بوو، بۆ ئه‌م هه‌ڵبژاردنه‌ ئێوه‌ تاچه‌ند ئه‌و جیاوازییه‌ كه‌مده‌كه‌نه‌وه‌؟
مه‌لا به‌ختیار: به‌بۆچوونی من پێموایه‌ له‌هه‌ڵبژاردنی داهاتووی په‌رله‌مانی عێراقدا جیاواز ده‌بێت له‌هه‌ڵبژاردنی په‌رله‌مانی كوردستان، سه‌باره‌ت به‌لیستی یه‌كێتی‌و گۆران، ئه‌توانم بلێم یه‌كێتی وه‌زعی باشتر ده‌بێت‌و ده‌نگی زیاتر ده‌بێت.

ده‌ستوور: مه‌سه‌له‌ی‌ ڕێكه‌وتنامه‌ی‌ ستراتیژی‌ و په‌یوه‌ندی ئێوه‌ له‌گه‌ڵ پارتی قسه‌ی‌ زۆری‌ له‌سه‌ر ده‌كرێت، ده‌ڵێن پارتی‌ پابه‌ندی‌ ڕێكه‌وتننامه‌كه‌ نییه‌و پێداگیری‌ ده‌كات له‌پۆسته‌كاندا؟
مه‌لا به‌ختیار: په‌یوه‌ندی ئێمه‌‌و پارتی له‌وه‌ چووه‌ته‌ده‌ر كه‌ كه‌سێك بسه‌پێنرێت، چونكه‌ بواری لێك تێگه‌یشتن‌و گفتوگۆ‌و رێكه‌وتن له‌نیوَانماندا به‌هێزه‌، پێموایه‌ ئێمه‌ باش تێده‌گه‌ین كه‌ ناتوانین به‌سه‌ر پارتیدا هیچ شتێك بسه‌پێنین‌و پارتیش باش تێده‌گات كه‌ناتوانێت به‌سه‌ر یه‌كێتیدا هیچ كه‌سێك بسه‌پێنێت، له‌ئه‌نجامی ئه‌و تێگه‌یشتنه‌وه‌یه‌ رێكه‌وتنمان كردووه‌، پۆسته‌ هه‌ره‌ سه‌ره‌كییه‌كانی هه‌رێمی كوردستانمان هاوسه‌نگ دیاری‌ كردوه‌.

ده‌ستوور: ئه‌وه‌ی‌ ده‌یڵیت راسته‌، به‌ڵام له‌ئه‌نجامی لاوازبوونی پێگه‌ی یه‌كێتی له‌پارێزگای سلێمانی، به‌شێك له‌ ئه‌ندامانی سه‌ركردایه‌تی پارتی‌و كۆمه‌لێك رۆژنامه‌نووسی حزبیان وتار ده‌نووسن به‌و ئاراسته‌یه‌ی‌ یه‌كێتی‌ هاوشانی‌ پارتی‌ نییه‌، بۆ ئه‌وه‌ی‌ زه‌مینه‌یه‌ك خۆشبكه‌ن بۆ ئه‌وه‌ی هاوسه‌نگی له‌گه‌ڵ یه‌كێتی نه‌پارێزن، بۆ نمونه‌ پۆسته‌كه‌ی د. به‌رهه‌م له‌به‌غدا حسه‌ی یه‌كێتی بوو، پارتی له‌به‌رامبه‌ر ئه‌وه‌دا سێ وه‌زیری هه‌بوو له‌كۆی 5 وه‌زیری لیستی هاپه‌یمانیدا؟

مه‌لا به‌ختیار: بڕیاروایه‌ وه‌زیرێك وه‌ربگرینه‌وه‌، دووه‌میش وه‌ك پێموتی مه‌سه‌له‌ی سه‌پاندن ده‌بێت ئێوه‌ باش وردببنه‌وه‌ ئه‌و مه‌سه‌له‌یه‌ له‌نێوانماندا نه‌ماوه‌، نه‌ ئێمه‌ هه‌ڵه‌كانی رابردوو ده‌كه‌ینه‌وه‌ نه‌ئه‌وانیش هه‌ڵه‌كانی پێشووتر دووباره‌ ده‌كه‌نه‌وه‌، بۆچونی‌ ئێمه‌‌و ئه‌وان جیا بێت بۆ هه‌ر پۆستێك‌و بۆ هه‌ر كارێك ئه‌مه‌ شتێكی ئاساییه‌، خۆ ئێمه‌ نه‌مانووتووه‌ بوینه‌ته‌ یه‌ك حزب، وتومانه‌ دوو حزبین له‌ چوارچێوه‌ی‌ ڕێكه‌وتنێكی ستراتیژیدا، له‌به‌رئه‌وه‌ هه‌م كۆكیمان هه‌یه‌ له‌سه‌ر شته‌كان‌و هه‌م ناكۆكی.

ده‌ستوور: دانانه‌وه‌ی كاك كۆسره‌ت وه‌ك جێگری سه‌رۆكی هه‌رێم بۆچی دواكه‌وتووه‌؟
مه‌لا به‌ختیار: بیروڕای‌ جیاوازمان له‌م باره‌یه‌وه‌ هه‌یه‌.

ده‌ستوور: به‌ڵام هه‌ست ناكه‌یت زۆری پێچووه‌، ئایا هه‌ر كاك كۆسره‌ت داده‌نرێته‌وه‌؟
مه‌لا به‌ختیار: به‌ڵێ زۆری پێچووه‌، به‌هۆی سه‌رقاڵی‌و شته‌كانی دیكه‌وه‌، هێشتا هه‌ردوو مه‌كته‌بی سیاسی قسه‌ی له‌سه‌ر دانانی جێگری سه‌رۆكی هه‌رێم نه‌كردووه‌، به‌ڵام هه‌ر كاتیًَك هه‌ردوو مه‌كته‌بی سیاسی قسه‌مان له‌و مه‌سه‌له‌یه‌ كرد، بیروڕامان به‌ ڕۆشنی‌ ده‌ڵێین.

ده‌ستوور: ئه‌گه‌ر پارتی پابه‌ندی ئه‌م رێكه‌وتنه‌ نه‌بێت، پێتوایه‌ زه‌ربه‌یه‌ك به‌ر ئه‌زموونه‌كه‌ بكه‌وێت؟
مه‌لا به‌ختیار: بێگومان ئه‌گه‌ر ئێمه‌‌و پارتیش پابه‌ندی ڕێكه‌وتنامه‌ی ستراتیژی نه‌بین لاسه‌نگییه‌كی خراپ ده‌كه‌وێته‌ دۆخه‌كه‌وه‌، ره‌نگدانه‌وه‌ی له‌هه‌موو ئاست‌و ئاراسته‌كاندا ده‌بێت، له‌وانه‌یه‌ كاره‌ساته‌كانی رابردوو دووباره‌ نه‌بێته‌وه‌، به‌ڵام له‌سه‌رجه‌م ئاسته‌كاندا ره‌نگدانه‌ی خراپ ئه‌داته‌وه‌.

ده‌ستوور: ئه‌گه‌ر له‌هه‌ڵبژاردنی داهاتووی په‌رله‌مانی عێراقدا كاندیده‌كانی پارتی دوو به‌رامبه‌ر، یان له‌ یه‌كێتی‌ زیاتریان ده‌رچوون، ئه‌وكاته‌ ده‌ستكاری رێكه‌وتنامه‌ ستراتیژییه‌كه‌ ناكرێت؟
مه‌لا به‌ختیار: ئه‌گه‌ر دووبه‌رامبه‌ری‌ ئێمه‌ هێنا، دانی پێدا ده‌نێین كه‌ ئه‌وان حزبێكی به‌هێزترن له‌ئێمه‌، ئه‌گه‌ر ڕێژه‌یه‌كیش زیاتر بوو، دانی پێدا ده‌نێین كه‌ ڕێژه‌یه‌ك له‌ئێمه‌ زیاترن، به‌ڵام باوه‌رناكه‌م كاریگه‌ری هه‌بێت بۆ سه‌ر رێكه‌وتنامه‌ی ستراتیژی، بۆ ئه‌م چه‌ند ساڵه‌ی كه‌ رێكه‌وتووین ئیشی خۆی ده‌بێت بباته‌سه‌ر.

ده‌ستوور: ته‌وه‌رێكی دیكه‌ كه‌ ده‌مه‌وێت قسه‌ی له‌سه‌ر بكه‌ین مه‌سه‌له‌یه‌ رێكخستنه‌كانی یه‌كێتییه‌ له‌ ده‌ره‌وه‌، ده‌وترێت به‌شێكی زۆری رێكخستنه‌كانی یه‌كێتی له‌گه‌ڵ بزووتنه‌وه‌ی گۆراندایه‌، به‌مدواییانه‌ سه‌ردانی ده‌ره‌وه‌تكرد باروودۆخی رێكخستنه‌كانی ده‌ره‌وه‌تكرد، باروودۆخی رێكخستنه‌كانی ده‌ره‌وه‌ی‌ یه‌كێتی‌ چۆن ده‌بینیت؟
مه‌لا به‌ختیار: باشتر له‌جاران ده‌بینرێت، راستییه‌كه‌ی ره‌وه‌ندی كوردی له‌ده‌ره‌وه‌ باشتر ده‌بینم، راستییه‌كانیان تا راده‌یه‌ك باشتر بۆ ده‌ركه‌وتووه‌، پرسیاری جدییان هه‌یه‌، ئاماده‌بوون له‌كۆره‌كاندا زۆر قه‌ره‌باڵغبوو، جگه‌ له‌كۆری نه‌مسا چونكه‌ كورد له‌نه‌مسا كه‌مه‌(120) كه‌سێك هاتبوو، له‌كۆره‌كانی دیكه‌دا له‌ سێسه‌د كه‌س كه‌متر نه‌هاتبوون، بێجگه‌ له‌وه‌ی خه‌ڵكێكی زۆر دڵسۆز‌و بێلایه‌نی كوردیش هاتبوون، پرسیاری زۆر په‌رۆشاییان ده‌كرد، رێكخستنه‌كانیشمان ده‌توانم بڵێم (50%) زیاتری كێشه‌كانیان له‌كۆڵ بووه‌ته‌وه‌، چونكه‌ پێشتر كێشه‌ زۆربوو له‌لایه‌ن ئه‌وانه‌ی ره‌گ بوون‌و ئه‌وانه‌ی له‌ژێره‌وه‌ له‌گه‌ڵ كۆمپانیای وشه‌دا بوون، به‌رپرسیاربوون له‌مه‌ڵبه‌نده‌كان به‌ئاراسته‌ی خۆیان ئیشیانكردووه‌‌و ئه‌وپه‌ری هه‌وڵیانداوه‌ كه‌س له‌ده‌وری یه‌كێتی نه‌مێنێت.

ده‌ستوور: له‌یه‌كێك له‌كۆڕه‌كانتدا له‌ده‌ره‌وه‌ گه‌نجێك ته‌ماته‌ی‌ تێگرتیت، ئه‌وه‌ چۆن بوو؟
مه‌لا به‌ختیار: مه‌سه‌له‌كه‌ ئه‌وه‌بوو، كۆڕێكمان هه‌بوو له‌ئۆسلۆ، دوای ته‌واوكردنی كۆره‌كه‌، كه‌سێكی گه‌نج هه‌ستا ته‌ماته‌یه‌كی گرته‌ شانۆكه‌، ویستی دووهه‌می تێبگرێت ئه‌وانه‌ی‌ پارێزه‌ری هۆڵه‌كه‌ بوون، په‌لاماریان داو هه‌رچه‌نده‌ ویستم ئه‌زییه‌تی نه‌ده‌ن، به‌ڵام كاردانه‌وه‌كه‌ بۆ ته‌مبێ كردنی توندبوو، له‌ناخه‌وه‌ پێم ناخۆش بوو، به‌ڵام ره‌فتاره‌كه‌ زۆر ره‌فتارێكی ناشارستانی بوو، دڵنیام كه‌ ئه‌وانه‌ لیژنه‌یه‌ك هه‌بوو به‌سێ كه‌س ئه‌و بریاره‌یان داوه‌، هه‌رسێكیان ئه‌ناسم، به‌به‌رنامه‌ كردوویانه‌، من ئه‌مه‌م پێناخۆشه‌، ئه‌و كاره‌شیان له‌ ڕێگه‌ی‌ كه‌سێكه‌وه‌ ئه‌نجامدا لێره‌ له‌كوردستان چه‌قۆی داوه‌ له‌كه‌سێكی دیكه‌‌و له‌به‌رده‌م داداگای كوردستان هه‌ڵهاتووه‌ بۆ نه‌رویج، هه‌روه‌ها له‌سه‌ر دزیش حوكمی‌ تر دراوه‌ له‌ كوردستاندا كه‌ ئه‌مه‌ش یه‌كێكه‌ له‌شته‌ خراپه‌كانی ئه‌وروپا كه‌ تاوتانبار داڵده‌ ده‌ده‌ن به‌ناوی مافی مرۆڤه‌وه‌.

ده‌ستور: هه‌ندێك ده‌ڵێن خه‌ریكه‌ دۆخه‌كه‌ وای لێدێت، مه‌سه‌له‌ن جاران سه‌ركرده‌كانی یه‌كێتی ده‌چوونه‌ ده‌ره‌وه‌ پێشوازییان لێده‌كرا، به‌ڵام ئێستا ته‌ماته‌یان تێده‌گرن؟
مه‌لا به‌ختیار: پێم وتی، من زۆر كۆڕم كردووه‌ پێشتر له‌ئۆسلۆش كه‌ نه‌ ڕه‌گ جیاببوونه‌وه‌‌و نه‌ مه‌ڵبه‌ندی ده‌ره‌ووه‌مان شێوابوو، ته‌نها 200كه‌س ده‌هاتن، به‌ڵام ئێستا زیاتر له‌ 350 كه‌س ئاماده‌بوون، گه‌نجێك ره‌فتارێكی ناشارستانی ده‌كات، با ته‌عمیمی نه‌كه‌ین به‌سه‌ر ڕه‌وه‌ندی كوردی‌و دڵسۆز‌و تێكۆشه‌ر‌و روناكبیری پارچه‌كان كه‌ په‌رۆشییه‌كی زۆرم لێبینین، له‌راستیدا به‌هۆی یه‌كێكه‌وه‌ خه‌ڵك ناشرین نه‌كه‌ین.

Start | Contact | PUKswed © 2018| Powerd by  Helanet Solutions
Home Contact